Аныяк малчынның чырык адынга

Улуг-Хем кожууннуң Ийи-Тал сумузунуң аныяк малчыны Таймир Шалган «Аныяк өг-бүлеге – кыштаг» төлевилелиниң баштайгы киржикчилериниң бирээзи. Ол кожууннуң, сумунуң хөй-ниитичизи болурундан аңгыда, Ийи-Тал сумузунуң бөмбүктүг хоккейге “Эң-не эки халдакчы” деп аттың эдилекчизи чораан. Таймир Шалганның бир чыл бурунгаар хенертен чүрээ сокпайн барганын Тываның Аныяк малчыннар эвилели дыңнаткан.

Т.В. Шалган турган болза, чаа-ла 35 харлаар турган. Ооң чырык адынга тураскааткан республика чергелиг бөмбүктүг хоккей маргылдаазы Ийи-Тал сумузунга болуп эрткен.

Хоккей маргылдаазынга аңгы-аңгы кожууннардан 15 команда боттарының күжүн шенежип киришкен.

Ийи хүн дургузунда чидиг демиселдиң түңнелинде бирги черни Бай-Тайга кожууннуң Бай-Тал сумузунуң “Урянхай” командазы бүзүрелдии-биле чаалап алан. Ийги черде Барыын-Хемчик кожууннуң Аксы-Барлык сумузунуң командазы төлептиг болган. Үшкү черни Чөөн-Хемчик кожууннуң Баян-Тала биле Бай-Тайга кожууннуң Кызыл-Даг сумузунуң командалары үлешкен.

Эрес-кежээ малчын өөнүң ишти Айдысмаа-биле 200 төрүүр хойнуң орнунга 20 инекти алган турган. Аныяк кыштагжыларның малының баш саны немежип көвүдээн. Ажыл-ишчи өг-бүле сүт болгаш сүттен кылган аьш-чем аймаан республика, кожуун, суму чергелиг көдээ ажыл-агый ярмаркаларынга делгеп, садып-сайгарып турар.