«Аныяк шүлүкчү» мөөрейниң тиилекчилери

Республика чергелиг «Аныяк шүлүкчү» мөөрейге 5-11 класстар аразынга Бай-Тайга, Сүт-Хөл, Барыын-Хемчик, Тес-Хем, Өвүр, Чеди-Хөл, Каа-Хем кожууннардан болгаш Красноярск хоорайдан 53 өөреникчи, 18-23 харлыглар аразынга Кызыл хоорай, Новосибирск хоорай, Мөңгүн-Тайга, Чеди-Хөл, Чаа-Хөл, Өвүр кожууннардан тос кижи киришкенин ТР-ниң Чогаалчылар эвилели дыңнаткан.

Мөөрейниң шииткекчилери болуп Тываның Улустуң чогаалчызы Э. Мижит, Россияның Чогаалчылар эвилелиниң кежигүннери М. Күжүгет, С. Өндүр, Тываның Чогаалчылар эвилелиниң кежигүннери Л. Ооржак, К. Конзай ажылдааннар.

5-11 класстар аразынга бирги черге Айгуль Монгуш (башкызы Сайсу Монгуш), ийиги черге Долгар Монгуш (башкызы Чочагай Сендажы) төлептиг болган. Үшкү черни Ай-Серода Тюлюш (башкызы Марина Ооржак) биле Карина Хертек (башкызы Сайзана Ооржак) үлешкен.


Бирги деткимче бижик – Долаан Ооржак (башкызы Саида Ооржак), ийиги деткимче бижик – Аганак Намгай-оол (авазы Айлаана Намгай-оол)

18-23 харлыглар аразынга бирги черни Самбажык Сандак, ийиги черни Соруктуг Шивитпей чаалап алган. Тиилекчилерниң башкызы Күжүгет.

Үшкү черни шииткекчилерниң шиитпирин барымдаалааш, кымга-даа тывыспас болган.

ТР-ниң өөредилге сайыдының хүлээлгезин күүседип турар Ирина Биче-оол Национал школаны хөгжүдер институттуң Тыва дылдың хүнүнге уткуштур чарлаан мөөрейлерниң тиилекчилеринге шаңналдарны тывыскан.