Аныяк-өскенниң номчулгаже сонуургалын оттурар төлевилел

Олеся Хертек – “Тываның командазы-2030” аныяктар шуулганының эрткен чылгы киржикчизи. Ол аңаа бодунуң «Дириг ном» литературлуг кино залы» деп төлевилелин камгалааш, грант тиилекчилериниң санынче кирген.

2020 чылда «Эрткен үени ажыдып тура» деп төлевилели-биле Россияның Президентизиниң грантылар фондузунуң мөөрейинге тиилекчи болган. Ынчангы ажылы – республиканың девискээринде үнүп турар солуннар болгаш сеткүүлдерниң экземплярларын электроннуг хевирже шилчидери. Эрткен чылын «Культура» национал төлевилели-биле ажылдап, үлегер-майыктың ном саңнарын ажыдарынга үлүг-хуузун киирген.

«Дириг ном» литературлуг кино залы» төлевилелди Тываның А. С. Пушкин аттыг национал ном саңынга, 40 кижини хаара тудуптар номчулга залынга, 12 хардан 25 хар чедир назылыг аныяк-өскенниң номчулгаже сонуургалын оттурары-биле кылган.

Кино залынга чүгле номчуттунар эвес, а төөгү болгаш уран-чечен чогаалдарның экранчыткан хевирлерин көөр арга бар. Төлевилелди боттандырып тургаш, классиктиг чогаалдарны, национал чогаалдың алдын фондузунче кирип турар тыва фильмнерни көргүзер. Оларның аразында «Алдан дургун» – Тываның төөгүзүнде бир дугаар тура халыышкын, «Дерсу Узала» – кол рольду тыва актер Максим Мунзук ойнаан, «Ак-көк хемниң кжилери» деп Тыва дугайында бирги фильм бар.

Литературлуг кино залының онзагай талазы – аңаа чүгле номнар номчуур, кинофильмнер көөр эвес, а чогаалчылар, төөгүчүлер, артистер, филологтар, башкылар-биле кады ону сайгарып чугаалажыры болур.