Чаа национал төлевилелдиң өөредилге албан черлерин үндезини-биле септеп-чаартыр программазынче Тываның алды көдээ школазы: Кызыл кожуунда Борбак-оол Араптан аттыг Сукпак ортумак школазы, Чеди-Хөл кожууннуң Хову-Аксы, Тес-Хем кожууннуң Чыргаланды, Сүт-Хөл кожууннуң Бора-Тайга, Барыын-Хемчик кожууннуң Аксы-Барлык база Бай-Тайга кожууннуң Кызыл-Даг суурларның школалары кирген. Чаа өөредилге чылында ийи муң хире оол болгаш уруг чагайжыткан байдалдарда өөренип эгелээр.
Тываның Баштыңы Владислав Ховалыг ажылдың ниити дүүштүрүлгезин чорударын ТР-ниң Өөредилге болгаш Тудуг яамыларынга дааскан.
Өөредилге чоруп турза-даа, апрель айда школаларга эде септелге ажылдары эгелей бээр. Муниципалитеттер чагыргазы, өөредилге эргелелдери база школа удуртукчулары септелге үезинде уругларның өөренир чурумун тодараткан. Оон аңгыда изиг чемненилгени ол-ла хевээр организастаар.
ТР-ниң Өөредилге яамызының дыңнатканы болза, өөредилге организацияларынга иштики ажылдардан аңгыда, даштын шеверлеп, кырын солуур. Суг хандырылгазының база чорудулгазының чаа четкилерин, өрт айыылынга удур база видеохайгаарал системазын салыр. Ол ышкаш одалга системазын база чырык удазынарын солуур. Чаа соңгаларны база эжиктерни салып, иштики шеверлел ажылдарын кылыр. Школалар чаа эт-септи база өске-даа дериг-херекселдерни алыр. Россияның Чырыдыышкын яамызының методиктиг сүмелери езугаар школачы шөлдерни шимээр.
Тывада школа инфратургузуун чаартыр программаны боттандырып эгелээнден бээр үш чыл дургузунда 46 школа ону ажыглаан. Республика бо чылдан эгелеп уруглар садтарынга үндезин септелге программазында киржир. Ыраккы Мөңгүн-Тайга кожууннуң Мугур-Аксы суурда уруглар садын бо чылын үндезини-биле чаартыр.
