Кызылда «Сылдысчыгаш» салым-чаяанныг уруглар төвүнге «Аныяктар компазы» төлевилелдиң боттанылгазы-биле чайгы профугланыышкынныг школаның байырлыг ажыдыышкыны болган.
ТР-ниң Чазак Даргазының оралакчызы Алексей Сазан-оол төлевилелдиң киржикчилеринге байыр чедирген. «Бо чылын «Аныяктарга регион» федералдыг программаның чорудуу-биле Тывада «Аныяктар компазы» төлевилелди бир дугаар боттандырып эгелээн. Чайгы школага назы четпээн уруглар аңгы-аңгы мергежилдер-биле таныжып алыр аргалыг. Дагдыныкчылар элээдилерниң боттарынга бүзүрелди оттурарынга, ортумак профессионал өөредилге албан черлеринче дужаап кирериниң уг-шиин билип алырынга дузалажыр. Ол ышкаш түр үеде ажылга тургустунарының аргалары база бар» – деп, оралакчы дарга төлевилелди таныштыргаш, элээдилерге чедиишкиннерни күзээн.
Тываның аныяктар херээниң талазы-биле сайыды Буян Кууларның дыңнатканы-биле алырга, школаның кижизиттирикчилерин 12 хүннүң дургузунда солун болгаш ажыктыг программа манап турар. Ол дээрге, Тываның билдингир кижилери-биле ужуражылгалар, өөредиглиг лекциялар, кино-кичээлдери, өөредилге черлери база республиканың болгаш найысылалдың онзагай черлери-биле таныжылга дээш оон-даа өске солун хемчеглер.
Школаның ажылы чайгы дыштанылга үезинде назы четпээннерниң дыштанылга ажыл-чорудулгазын организастаарынче болгаш тускай сорулгалыг профугланыышкынныг ажылынче угланган. Ында 30 назы четпээн уругну: тоску класстың доозукчулары болгаш ортумак профессионал өөредилге черлеринде өөренип турар сургуулдарны хаара туткан.
Тываның Баштыңы Владислав Ховалыгның эгелээшкиниң-биле республиканың аныяктарынга профугланыышкынныг ажылды чорудар сорулга-биле 2026 чылдан эгелеп «Аныяктар компазы» төлевилел боттанып турарын сагындыраал.
Чаа төлевилел – назы четпээннерни билиглерже болгаш арга-шинектерже углап турар айтыкчы. ТР-ниң Чазааның чанында назы четпээннер херектериниң болгаш эргелер камгалалының талазы-биле албан черлер аразының комиссиязының, Тываның Аныяктар херээниң талазы-биле, өөредилге, күш-ажыл, иштики херектер, спорт, культура яамыларының дээш оон-даа өске албан черлериниң деткимчези-биле боттандырып турар.
Школаның ажылы июль 26-га чедир уламчылаар.