Тываның найысылалы Кызыл хоорайга бо чылдың апрель 9–10 хүннерде болуп эртер “Тыва: Агроинвест-2026” инвестиция шуулганы Сибирь Енисейи агроүлетпүр комплекизинде чугула экономиктиг болуушкуннарның бирээзи.
Бо чылда шуулган “Сибирьниң агорүлетпүркомплекизи – эки шынарлыг экологтуг продукция” деп темага колдадыр эртер. Экологтуг продукция – шынары шыңгыы экологтуг стандартарга дүгжүр, сертификацияны эрткен дугайында тускай демдектиг барааннар. Оларның өртээ аар болуру чугаажок.
Тываның арыг агаар-бойдузунуң байдалын алыр болза, эң ылаңгыя сүт, эът дээн ышкаш малдың экологтуг продукциязын, эвээш хемчээлдиг-даа болза, бүдүрүп болурунуң аргазы бар деп эксперттер санап турар.
Шуулганга федералдыг болгаш регионнар чергелиг органнар, инвесторлар, Сибирь федералдыг округта бараан бүдүрүкчүлери болгаш Кыдаттың, Моолдуң делегациялары киржир. Ажыл-агыйжы программазынга инвестиция сессиялары, көдээ ажыл-агыйның чаа төлевилелдери-биле таныжылга дээш өске-даа хемчеглер болур эртер.
Кады ажылдажылга дугайында дугуржулгаларны болгаш керээлерни киржикчилер аразында чарар. Эрткен чылын болуп эрткен шуулганга кады ажылдажылга дугайында 30 дугуржулганы чарганын сагындыраал. Оларның чамдыызы Тывада, чижээлээрге, малдың уксаажыдылга ажылында боттандырып турар.
