Араганың кижиге болгаш ниитилелге салдары кандыгыл?

Республиканың туберкулезка удур диспансерниң 1 дугаар өкпе туберкулезунуң терапия салбырының эргелекчизи Анай-Хаак Сан-Хоо бистиң чуртталгавыста эң-не чугула чүүл – кадыкшыл деп санап турар.

– Бистер чүгле боттарывыстың кадыкшылывыс дээш эвес, а келир үениң салгалының кадыкшылы дээш харыысалгалыг болур ужурлуг бис. «Арага – кижиниң баш мээзинге багай салдарлыг» – деп, эртемденнер удаа-дараа бижип турар. Ону үргүлчү ижип чоруур кижи алызында барып, уттуучал апаар деп олар айтып турар.

Бо бүгү түр када-даа бол, баш мээзиниң клеткаларының үрелип турарын херечилеп турары ол. Баш мээзинге багай салдарындан аңгыда, ижин-баарны база арага үреп чоруур (цирроз печени, энцефалопатия деп аарыгларны тывылдырар).

Арага ижери дээрге хоочураан аарыг. Алкоголизмден аарый берген кижилер эмнээшкинниң эге чадазында аарый бергенин угаап билбес болур. Ол алкоголизмниң бир ылгавыр демдээ. Алкоголизмден аарып чоруур улустуң иммунитеди кошкак болур. Аңгы-аңгы аарыглардан аарып болур: угаан-медерел аарыы, ижин-баар, өкпе-чүрек, бүүректер дээш, шуптузунга дээр.

Аза сартыы болур арагага алдыртпайн, өгбе камгалалындан туттунуп, езу-чаӊчылдарывысты сагып, кайгамчыктыг чараш, аас-кежиктиг, өөрүшкү долган амыдыралды эчизинге чедир эдилээлиӊер.