Арбитраж судунга студентилерге «чурагайлыг» ужуражылганы эрттирген

ТР-ниң Арбитраж судунга юрист студентилерге өөредиглиг семинар болуп эрткенин шүүгү чери дыңнаткан.

Шүүгү чериниң ажылдакчылары Тываның күрүне университединиң юридиктиг факультединиң дөрткү курсчуларынга «Арбитраж чорудуу» эртемни өөредири-биле ук хемчегни организастап эрттирген.

Суд чорудулгазын болгаш херек эмгелээшкинин хандырар килдистиң начальниги Ч.К. Салчак допчулал-биле «Мээң арбитрим», «Арбитраж херектериниң картотеказы», «Арбитраж судтарының шиитпирлер банкызы» деп чурагайлыг сервистер дугайында таныштырган.

Ч.К. Салчак «Мээң арбитрим» сервис таварыштыр документилерни электроннуг хевирге кииреринче онза кичээнгейни угландырган. Сервисче дүн-хүн чок кирери, чорудулганың ажык-чарлыг болуру база билдириишкинниң эрге-байдалын хууда кабинединге хайгаараары дээн ышкаш эки талаларынга тодаргайы-биле ол доктааган.

Документилер дужаарының ындыг хевири парлаар, хоолгалаар болгаш почта чорудуунуң чарыгдалдарынга, үеге болгаш саң-хөөге камналганы бээр.

Информатизация секторунуң тускай мергежилдиг ажылдакчызы А.А. Сагандай электроннуг системаларны, херектиң материалдары-биле онлайн таныжылга база онлайн хуралдарга киржириниң дугайында дилеглерни канчаар киирерин көргүскен.

Студентилер технологияларга аажок сонуургалдыг болган: ужуражылга үезинде-ле телефоннарынга чурагайлыг сервистерни идепкейлиг шенеп эгелээн.

Семинар соонда келир үениң юристери өөредиглиг болгаш ажыктыг ужуражылга дээш суд ажылдакчыларынга четтиргенин илереткен.