Арга-арыг яамызы ине бүрүлүг чаш ыяштарны камгалаар талазы-биле хемчеглерни күштелдирген

Чылдың-на чаа чыл байырлалдарының бүдүүзүнде ине бүрүлүг чаш ыяштарны хоойлуга удур кезерин болдурбас дээш, хемчеглерни ап чорудуп турар.

Тываның Арга-арыг болгаш бойдус ажыл-агый яамызының айтыышкыны-биле, республиканың арга-арыг ажыл-агыйлары арга-арыг хоойлужудулгаларын хажыткан таварылгаларны болдурбас, демисежир база илередир дээш арга-арыг инспекторларының дежурный графигин база албан черлер аразының ажылчын бөлүктеринге хайгыыл маршруттарын тургускан.

Туран болгаш Барыын-Хемчик арга-арыг эргелелдериниң инспекторлары, Россияның Тыва Республика талазы-биле Иштики херектер яамызының эргелелдери-биле кады «Шивилиг» биле «Ак» доскуулдары таварты арга-арыг продукциязының сөөртүлгезинче хыналданы күштелдирген. Албан черлер аразының бөлүктери ыяш сөөртүп турар автомашиналарны дозуп, оларның фитосанитарлыг негелделерге дүгжүп турарын хынап турар.

Арга-арыг яамызы шиви садып турар улус арга-арыг эргелели-биле садып-сайгарылга керээзин чарган турар ужурлуун, аңаа кезер ыяштарының санын айтып каан болурун сагындырган. Шиви садыгжылары бараанының фитосанитарлыг документилерин болгаш санын айыткан турар ужурлуг, а садып алыкчылар ыяштарны кажан, каяа кескенин билип алыр аргалыг.

Тываның чурттакчызы аргадан чаа чыл шивизин хоойлу езугаар кезип ап болурун база сагындырган. Ону кылырда, тус черниң арга-арыг черинге баргаш, садыглажылга керээзин чаргаш, ажылдакчы-биле кады чараш шивижигешти шилип ап болур. Шивиниң өртээ ооң хемчээлинден хамааржыр. Арга-арыг ажыл-агыйы-биле садыглажылга керээзин шыгжап алыры чугула, ол хоойлу езугаар ыяшты садып алганының бадыткалы болур.

Арга-арыг фондузунга когарал чедиргени дээш арга-арыг хоойлужудулгаларын хажытканы база аныяк ыяштарны хоойлуга удур кескени дээш, РФ-тиң Административтиг кем-херек үүлгедиишкиннериниң дугайында хоойлунуң 8.28 чүүлү-биле 3000 рубльден 4000 рубль чедир административтиг торгаалды онаап болур.

Бир эвес когаралдың түңү 5000 рубльден ажа бээр болза, Россия Федерациязының Кеземче хоойлузунуң 260 чүүлү-биле кеземче херээн оттурар.