Арыскан суурнуң эрес-кежээ ногаажызы, социал керээге үндезилээн күрүне деткимчезин алган Саяна Сат чылдың-на январь-февраль айларда соңга караан долдур бичии саваларга өзүмнерни тарып алырын чагырга чери дыңнаткан.
Херээжен чон бажыңнарының даштынга чүзүн-баазын өңнүг чечектерни олуртуру чаңчыл апарган. Саяна Сат эгелеп чоруур ногаажы аныяк аваларга арга-сүмезин кадып, мастер-класстарны сумуларда эрттирип турар.
Бо удаада арга-дуржулгалыг ногаажы культура бажыңынга чечектер эустома, петуния) өзүмнерин канчаар тарыырын, чара олуртурун, суггарарын, чемишчидерин база хөрзүн кыспас кылдыр чүнү холуурун аваларга айтып берип, тайылбырлаан.
Хемчегни сонуургап келген херээжен улус арга-дуржулгазын солчуп, тарып алган хөй чечектериниң өзүмнери-биле үлешкен.
Удавас ногаажылар чечектер база ногаа өзүмнерин садып эгелээр.
Чайын Саяна Саттың чурттап турар бажыңын долгандыр олурткан чараш чечектери саглаңнадыр частып келир.