Артур Хертек – Алаштың балыкчы оглу

Бөгүн Тывада ат-сураа билдингир журналист Артур Хертектиң төрүттүнген хүнү. ТР-ниң алдарлыг ажылдакчызы, хоочун солунчу Светлана Балчыр чаңгыс чер чуртуунуң дугайында сактыышкыннары-биле үлешкен.

– Артур Хертек-биле «Шын» солунга хөй чылдар дургузунда кады ажылдадым. Бажы бедик Бай-Тайганың кончуг чараш булуңу, төвү Тээли суурга төрүттүнген дуңмам чүве. Өрү чүткүп, көскүлеңнээр хөңнү чок кижи.

Удуртукчу кижи болгаш, ол чаш ажы-төлдүг ажылдакчыларынга аажок кичээнгейлиг. Бир чылын чаа өөредилге чылы эгелээриниң бүдүүзүнде “Парлаар чүүлдерни эртежик дужаапкаш, даарта ажылче келбейн, өөреникчи оолдар, уругларыңар-биле сентябрь 1-леп алыңар” дээнин сактып олур мен.

Дыштанылга хүннери суббота, улуг-хүнде кандыг-бир хемчеглер чырыдар апарганывыста, аргалыг-ла болза, ынаар эр корреспондентилерни хаара тударын бодаар. Херээжен кижиниң бажың ажылы төнер эвес дээрзин эки билир.

Солун арыннарынга республиканың хоорайларының, кожууннарының болгаш сумуларының ажыл-амыдыралын дески чырыдарын бистен ол негээр турду. Сургакчылаашкындан эккелген материалдарны черле саадатпас, дарый үндүрер.

"Кол редактор-ла мен" дээш чааскаан шиитпир үндүрбес. Коллективтиң азы редколлегияның кежигүннериниң санал-оналын кичээнгейге ап чаңчыккан. Солун сайгарылгазының хуралынга безин, баштай ажылдакчыларның саналдарын, үнелелин, шүгүмчүлелдерин дыңнааш, төнчүзүнде дорт болгаш допчу харыыны берип каар.

Чаа үнген солуннарны сайгарып чугаалажыр “летучка” деп хуралдарывыс дыка дүшкүүрлүг, изиг-изиг-ле эртер турган. Аңаа редакторувус “демдектерни” кам-хайыра чок-ла салыр эвеспе. “Демдек-даа” канчаар, редакторнуң өөредиглиг сайгарылгазындан дыка хөйнү аныяктар өөренип алыр чүве.

Мээң эң баштайгы редакторум В.С. Шаравии ышкаш, “Солунчу кижи үргүлчү чон аразынга, ырак-чоок оруктарга чоруур ужурлуг” дээр. Чазак, Дээди Хурал, яамылар-биле харылзажып тургаш, солуннуң бир-ле корреспондентизин дарга-бошкаларның машина-балгадынга бо-ла “ушкаштырыптар”.

Редакцияның машина-балгады-биле бир бөлүк кээп турда, өскези сургакчылап үнүп турарын шыңгыы сагып, негээр турду. Ооң түңнелинде, солуннуң арыннарынга парлаттынган чүүлдер хөй янзы темалыг, аңгы-аңгы хоорай, суурлар, кожууннар болгаш сумулардан чыгдынган болур.

Удуртукчу кижи болгаш, Артур Ойняр-оолович коллективтиң ажылдакчыларынга таарымчалыг байдалды тургузар дээш, эрге-чагыргага чедир негелделерни тургузуп шыдаан. 1990 чылдарның төнчүзү 2000 чылдарның эгези аажок нарын үеде компьютерлер-биле хандырарын чедип ап, чаа техниктиг дериг-херекселдер-биле ажылдаа-рынга бисти өөреткен. Ооң мурнунда бижик кагар машиналарга парлап, соктап олурган болгай бис.

2004-2005 чылдарда “Шын” солуннуң редакциязының шупту эрги эт-севин солуп, чаа стол-сандайларны, шкафтарны чаартканын утпас бис. Чаа техникалыг, чаарты дерээн өрээлдерге ажылдаарга, ажыл-даа бүдүнгүр, бижикчилер биле номчукчулар аалдап келирге, оларны хүлээп алыры эптиг апарган.

Артур Ойняр-оолович өг-бүлезинге аажок кижи. Дүъш санында-ла ыяап-ла чанар. Өөнүң ишти Виктория Болатовна бухгалтер мергежилдиг. Хертектер үш оолдуг улус.

Солунчунуң, редакторнуң чай чок чымыштыг ижин кылбышаан, Артур Ойняр-оолович чогаал ажылын база кагбаан. Чалыы шаанда чырыкче үндүрген номунда шүлүктери дыка чараш. Сөөлгү үеде очулга ажылының “хааны” апарган дизе, хөөредиг эвес. Чөөн чүктүң болгаш даштыкы чогаалчыларның ажылдарын ол очулдурган.

Тываның чогаалчылар эвилелиниң кежигүнү Артур Хертек демир-үжүүн холдан салбаан. Чогаалдарыңарны ам-даа номчуур бис, манаар бис, Артур Ойняр-оолович. Кадык-ла болуп көрүңер.