Тывада «Улусчу фронт. Бүгү чүүлдү тиилелгеже!» төлевилелдиң чорудуу-биле республикадан тускай шериг операциязында киржип турар дайынчыларга ачы дуза чыылдазының күскү кампаниязы уламчылап турар.
Улуг-Хем кожууннуң Арыскан, Хайыракан, Иштии-Хем сумузунуң чурттакчылары дайынчыларга чажыртынып шыптынар четкилер кылырын уламчылап турарын чагырга чери дыңнаткан.
Арыг-Бажының идепкейжилери ддизельдиг генераторну садып белеткээш, дайынчыларның хей-аъдын көдүрүп, камгалаар кылдыр ыдыктыг Үш-Мөөрүк тайгазындан эккелген кызыл сыптыг сөөскен-биле кымчыларны кылып белеткээннер.
Күскү ачы-дуза чыылдазы октябрь 22-ке чедир уламчылаар. Мурнуку шугумда дайынчыларга машина-техника, техниктиг херекселдер, генераторлар улуг хереглелдиг. Чыгдынган ачы-буян чүъгүн 20 тоннаның ийи чүък автомашиназы ийи аңгы угланыышкынче (Курск облазы болгаш Донецк) чедирер.
Тускай шериг операциязында киржип турар эрес-дидим маадырларга деткимче көргүзер күзелдиг улус «Норзин» Садыг төвүнче (Тыва эки турачылар кудумчузу, 3) кээп болур. Харылзажыр телефону: 2-10-50.