Тывага Хамааты байдалдың актылар бижидилгезиниң эргелелиниң тургустунган хүнүнде Арыг-Үзүүнден Айдыс Ондар биле Аяна Шойдаа тыва езу-чаңчылдарны сагып, өг-бүле тудуп бадылашканын чагырга чери дыңнаткан.
Тываның хамааты байдалдың актылар бижидилгезиниң Улуг-Хем кожуунда эргелелиниң ажылдакчылары Маайа Монгуш биле Алена Түлүш аныяктарның чуртталгазында уттундурбас, онза-чырык өөрүшкүлүг хүнде салым-хуузун каттыштырып, байыр чедирген.
Байырлалдың кол маадырлары, Шагаа бүдүүзүнде, тыва чоннуң чараш езу-чаңчылы-биле чырыктажып, алдын билзектерин солушканнар.
Улуг-Хем кожууннуң, Арыг-Үзүү суму чагыргазының удуртулгазы аныяк өг-бүлеге ак кадактарны сунуп, эң-не чаагай күзээшкиннерни илередип, белек-селээн сөңнээн.
Аныяктарның чоок кижилери байыр чедириишкиннеринге катчып, боодал чечектерни, суй белектерин сунуп, чагыг-сүмезин бергеннер.
