Улуг-Хем кожууннуң Арыскан – Арыг-Үзүү аразында чазаглыг орукта сес улуг, биче көвүрүг бар. Оларның ийизи шору улуг көвүрүглер.
Арыскан суурнуң чанында кара-сугну кежир улуг көвүрүг эргижирээш, адаа ирип, бир талазы шуут чирли берген болгаш чурттакчы чонга аргыжарынга айыылды тургузуп турган.
Каш чылдар дургузунда айыылдыг байдалга турган, улуг көвүрүгнүң бирээзи эргижирээш, адаа ирип, бир талазы чирли берген турда бо чылын чаарткан, ажыглалче киирген. Кежигниң узуну 30 метр, дооразы 7 метр. Эки шынарлыг болгаш быжыг көвүрүг арысканчыларга шаптараазын чок аргыжар байдалды тургускан. Чаа ыяш көвүрүг быжыг болзун дээш, ооң адаан демир-бетон-биле кылган.
Улуг-Хем кожууннуң удуртулгазы арысканчыларга байырын чедирип, кызыл кожааны кезип, тудугжуларны шаңнап мактаан. Сумунуң хоочун чурттакчызы Марта Тас-оол ак сүдүн чажып, артыжап, йөрээлин салган.
