«Аржаан» көдээ ажыл-агый кооперативиниң ак чеми

Бистиң чуртка удур чарлаан кызагдаашкындан кандыг-даа хамаарылга чокка, Тываның бүдүрүлгелери бо хүннерде ажыл-агыйын соксатпайн, ажылдап турар.

Бии-Хем кожуундан Нелли Чамзы «Аржаан» көдээ ажыл-агый хереглел кооперативин 2006 чылда школага башкылап тургаш-ла ажыткан. Өг-бүлениң агробизнести ажыдар дугайында бодалы анаа-ла төрүттүнүп келбээн: боттарның хуу малының баш санының өскени-биле сүт продукциязын болбаазырадып садары – ажыл-ижиниң негелдези апарган.

2014 чылдың төнчүзүнде Чамзының өг-бүлези «Чаңгыс суур – чаңгыс бүдүрүлге» төлевилелиниң комиссиязынга бизнес-төлевилелин камгалааш, бир ээлчегде муң литр сүт болбаазырадыр күчүлүг цехти тударынга күрүне деткимчезин алган.

Сүт болбаазырадыр цехте сүттү хүлээп алыр, арыглаар, соодар, изидер, хайындырар, тырттар, кудар, савалаар болгаш шыгжаар технология шугуму бар. Цехтиң сүт дериг-херекселдерин, иштики болгаш даштыкы ажылдарын аъш-чем адырынга чөпшээрээн амгы үениң материалдары-биле кылган.

«Аржаан» көдээ ажыл-агый кооперативи сүт, хойтпак, өреме, ээжегей, ак саржаг база йогуртту Кызылдың көдээ ажыл-агый рыногунда база аъш-чем садыгларында дужаап, чоннуң хереглелин хандырып турар.

Бии-Хем кожууннуң социал-экономиктиг хөгжүлдезинге үлүг-хуузун киирип турар сайгарлыкчыларның бирээзи – «Аржаан» көдээ ажыл-агый хереглел кооперативиниң удуртукчузу Нэлли Чамзы Тыва Арат Республиканың тургустунганындан бээр 100 чыл оюнга тураскааткан юбилейлиг медаль-биле чоокта чаа шаңнаткан.

Көдээ ажыл-агый бүдүрүлгезиниң удуртукчузу Нэлли Чамзы чылдың башкы айында Москвага делегей чергелиг «Агрос-2022» мал ажылы, уксаажыдылга херээ болгаш мал чеминиң бүдүрүлгезиниң делгелгезинге киришкен.

Аржаанчылар сумузунуң сүт болбаазырадыр цегинче артыкшылдыг сүдүн дужаап, акша-төгерикти ажылдап ап турарлар.