Бии-Хем кожууннуң Аржаан школазы 80 чыл оюн демдеглеп эрттиргенин чагырга чери дыңнаткан. Амгы үеде школада 130 уруг өөренип, 30 башкы ажылдап турар.
Байырлыг хемчегни өөредилге чериниң директору Алла Байкара ажыдып, школа ажыттынганындан бээр элээн хөй чүүлдер өскерилгенин онзалап демдеглээн.
Бии-Хемниң чагырга даргазының хүлээлгезин күүседип турар Саян Бай-Кара школаның коллективинге байыр чедиргеш, шылгарааннарга хүндүлел бижиктерни тывыскан.
Күш-ажылдың хоочуну, 82 харлыг эне Клара Кенденовна Сенги «Бии-Хем кожууннуң алдарлыг ажылдакчызы» хүндүлүг атка төлептиг болган. «Бии-Хем кожууннуң өөредилгезиниң алдарлыг ажылдакчызы» аттарны школаның башкылары – Лидия Шойла, Урана Оюн, Аяна Монгушка тывыскан.
ТР-ниң Дээди Хуралының депутады Аяна Монгуш, Аржаан суму чагыргазының даргазы Екатерина Тулуш, суму баштыңы Буян Байкара, кожууннуң школалар директорлары байыр чедириишкиннеринге катчып, башкыларга өзүп орар салгалды эртем-билигге өөредип, кижизидип чорууру дээш четтиргенин илереткен.
Төрээн школазының байырлалынга хүндүлүг дыштанылгада башкылар, 1970 чылдан тура доозукчулар база киришкен.
Доозукчулар ынак школазын утпайн, башкылары-биле доктаамал ужуражыры чаагай чаңчыл апарган. Ол харылзаа салгал дамчып уламчылап турар.