Бии-Хем кожууннуң Аржаан ортумак школазының доозукчузу, сураглыг кезер эмчи Темирлан Ховалыг төрээн школазынга кээп, өөреникчилер-биле ужуражылганы эрттиргенин республиканың немелде өөредилге сайзырадыр төвү дыңнаткан.
Темирлан Ховалыг профессионал арга-дуржулгазы-биле үлешкен болгаш, эмчи мергежилин шилип алганының дугайында, ук эртемниң онзагайы база чугулазын уруглар-биле сайгарып чугаалашкан. Ол ышкаш салдынган сорулгаларын чедип алырынга школа база ынак башкылары салдарын чедирген деп, аныяк эмчи онзалап демдеглээн.
Школачылар ооң практиктиг ажылындан чижектерни сонуургаан. Оон аңгыда медицина талазы-биле мергежилди сонуургап турар доозукчуларга аныяк эмчи сүмелерни берген. Өөреникчилер сонуургаан айтырыгларын идепкейлиг салып, тодаргай харыыларны алганнар.
Школаның чедиишкинниг доозукчуларының бирээзи чалыы чаңгыс чер чурттугларынга ажыктыг медээлерни чугаалап берип, аныяк салгалдың мергежил шилип алырынга үлүг-хуузун киирген.
