Эрзин кожууннуң Нарын сумузундан тускай шериг операциязының киржикчизи Очур-Баяр Шактарның чырык адын мөңгежидип, тураскаал самбыраны ажыткан.
Маадырның чоок кижилери – авазы Ольга Эртинеевна, өөнүң ишти Айлаңмаа Андреевна, ажы-төлү, дайынчы эштери, школаның удуртулгазы, чаңгыс классчылары дээш өске-даа аалчылар кээп, Очур-Баяр Шактарның дугайында чылыг сактыышкыннары-биле үлешкен.
Школачылар ада-чуртчу ыры-шүлүктерин бараалгаткан. Хүреш маргылдаазынга республиканың аңгы-аңгы булуңнарындан
мөгелер киришкен. Шылгараан дөрт шыырак мөге – Сүт-Хөлден Субудай Насык-Доржу, Эрзин кожууннуң төлээлери Максим Ооржак, Чимит Хангай биле Сүрүн Балдан.
Хүреш үезинде чараш оюнну көргүскен мөгелерге тускай шаңңалдарны тывыскан: «Чараш арга» – Сүрүн Балдан, «Чараш девиг» – Болат Калиндиви, "Тиилелгеже чуткул" – Ариан Шыырап.
Маадырның чоок кижилери болгаш төрелдери, чаңгыс классчылары, дайынчы эштери, маргылдааның эрттирикчилери тиилекчилерни шаннап-мактаан.
Очур-Баяр Шактар Бии-Хем кожууннуң Аржаан сумузунуң хүндүлүг хамаатызы турганын чагырга чериниң даргазы Екатерина Тулуш дыңнаткан. Өөнүң ишти Аржаан школазында география башкызы. Айлаңмаа Шактар үш ажы-төлү-биле арткан. Аржаанчыларга маадыр күдээзиниң чырык ады кезээ мөңгеде сактыышкын болуп артар. Ол кижизиг, дузааргак, ажылгыр, чазык аажы-чаңныг турган.
Бодунуң берген даңгыраанга төнчүзүнге чедир шынчы болуп, шериг хүлээлгезин сыныш чок күүсеткеш, бажын салган маадырны «Эрес-дидим чоруу дээш» орден-биле мөчээн соонда шаңнаан.
