Аржаан сумузунуң уруглар садының командазы – бирги черде

Бии-Хем кожуунга школа назыны четпээн уругларның өөредилге албан черлериниң ажылдакчылары болгаш кижизидикчи башкыларының хүнүнге тураскааткан турисчи слет болуп эрткен.

Кожууннуң школа назыны четпээн уругларның өөредилге албан черлериниң ажылдакчыларының аразынга спортчу хемчегге Аржаан сумузунуң "Алёнушка" уруглар садының командазы бирги черни чаалап алган.

Турисчи слетка Туран хоорайдан болгаш сумулардан тос команда идепкейлиг киришкен. Киржикчилер арыг агаарга чадаг туризм техниказынга, уг-шиг тыварынга күжүн шенежип, хана-солуннар, паштанчылар, капитаннар мөөрейлеринге маргылдажып, бот-тывынгыр уран чүүлге салым-чаяанын көргүскеннер.

Маргылдааның түңнелдери-биле бирги черни Аржаанның "Алёнушка" уруглар садының, ийиги черни Сесерлигниң "Салгал", үшкү черни Тарлагның "Чинчи" уруглар садтарының демниг командалары тус-тузунда чаалап алганнар. Тиилекчилерни өртектиг белектер, дидиг хойлар-биле шаңнап-мактаан.

Аржаан сумузунуң чагырга чериниң удуртулгазы маргылдааның эрттирикчилери – Сесерлиг сумузунуң чагырга черинге, "Салгал" уруглар садының коллективинге, эргелекчизи Елена Салчакка, Бии-Хем кожууннуң чагырга черинге, өөредилге эргелелинге болгаш хөй санныг деткикчилерге четтиргенин илереткен.

Келир чылын эстафетаны Аржаан сумузунуң "Алёнушка" уруглар сады хүлээнип алган.