Бии-Хем кожууннуң Аржаан школазынга «Маадырның партазын» ажытканын чагырга чери дыңнаткан.
Биче сержант, часпас адыгжы Орлан Доржукай тускай шериг операциязының үезинде хүлээлгезин сыныш чок күүсеткеш, амы-тынындан чарылган. Маадырны «Эрес-дидим чоруу дээш» орден-биле мөчээн соонда шаңнаан.
Ук партага бир дугаарында олурар эргени 11-ги класстың өөреникчизи, тергиин спортчу Чойган-оол Монгушка база 10-гу класстың өөреникчизи Алдын Монгушка берген. Школачылар шээжилеп алган ада-чуртчу шүлүктерни чугаалаан.
Бии-Хем кожууннуң чагырга даргазының социал-политика талазы-биле оралакчызы Орлан Байкара, кожууннуң шериг комиссариадының, Аржаан сумузунуң удуртулгазы, маадырның өг-бүлези, чоок кижилери, клазының башкызы Ирина Монгуш болгаш чангысклассчылары сактыышкын езулалынга киржип, маадырның дугайында чылыг сактыышкыннары-биле үлешкен.
Улаштыр эр, херээжен улус аразынга хол бөмбүүнүң маргылдаазын эрттирген. Тиилекчи командаларга өртектиг белектерни, дириг хойларны тывыскан.
Орлан биле Сюзана Доржукайлар «Чаа сорук» төлевилелиниң 2021 чылдың киржикчилери. Өгнүң эр ээзи долу эвес мөөңнээшкин езугаар шериг албан-хүлээлгезин күүседири-биле кыйгырткан турган.
Аржаанчылар чаңгыс чер чурттуунуң маадырлыг чоруун кезээ мөңгеде утпас.
