Аржаанчылар чаңгыс дем-биле малын чугдурган

Бий-Хем кожууннуң Аржаан сумузунуң база Чкаловка арбанының малчыннары хой-өшкүзүн саргы, кодур болгаш өске-даа халдавырлыг аарыглардан камгаладып, чугдурганын чагырга чериниң даргазы Екатерина Тулуш дыңнаткан.

Аржаанның чагырга чериниң болгаш культура ажылдакчылары көдээ ишчилеринге сүттүг шайын хайындырып, амданныг аъш-чемин белеткеп, оларны деткиири чаңчыл болган.

Аныяк мал эмчизи Аяна Маады сугга холуур эмнин хемчээлин хынап турган. Ол чылдың-на мал-маганга ящурга, сибир язвазынга, бруцеллезка удур камгалал тарылганы салып турар.

Аржаан сумузунуң эр хиндиктиг чону чагырга чериниң удуртулгазы-биле совет тургузуг үезинде кагдынган хой чуур оңгачаны 2020 чылда катап септеп, аңаа шээр малын чугдуруп эгелээнин сагындыраал.

“Кыштаг”, “Чаа сорук” төлевилелдериниң киржикчилери база хой-өшкүзүн “эжиндирген”. Көдээ ишчилер сөөлгү кодан малдың чуулдазы төнгүжеге чедир, бот-боттарынга дузалашкан соонда, малын сүрүп алгаш чанганнар. Аржаанчылар чаңгыс дем-биле малын чугдурганы ол.