Аржаанчылар оттулар ыяшты белеткээн

Бии-Хем кожуунда Тывадан долу эвес мөөңнээшкинче кыйгырткан дөрт хамаатыларның өг-бүлелеринге чери ачы-дуза чедирилгезин уламчылап турар.

Аржаан сумузундан долу эвес мөөңнээшкинче дөрт хамааты кыйгыртканын тус черниң чагырга чери @tmgnews17 дыңнаткан. Сумунуң чагыргазының болгаш ажылчын коллективтериниң эр чону чаңгыс чер-чурттугларының өг-бүлелеринге кыжын оттулар ыяшты белеткээн. Чагырга чери кывар-чаар материал-биле деткикчилээн.

“Россети Сибирь” компанияның ажылдакчылары долу эвес мөөңнээшкинче кыйгырткан хамаатының дилээн хандырып, счетчигин бажың даштынче эде тургузуп берген.

Сумунуң чагырга чери, культура ажылдакчылары, "Энелер" хоочуннар чөвүлели шериг оолдарга чылыг хөректээштерни даарап, уктарны аргып турар.

Бии-Хем кожуунда Туранның арга-арыг ажыл-агыйының албан чери-биле керээ езугаар он үш өг-бүлеге беш-беш куб оттулар ыяшты белеткээш, чедирген.