Аржаанда чымыштыг иш эгелээн

Бии-Хем кожууннуң Аржаан сумузундан «Социал керээ» программазының 2021 чылда киржикчизи Аяс Сүрүнчүк күрүнениң деткимчези-биле мал кыргыыр тускай дериг-херекселди садып алгаш, чымыштыг кыргылда үезинде ачы-дузазын чонга чедирип турар.

Күрүне деткимчезиниң алыкчызын эрткен күзүн долу эвес мөөңнээшкинче кыйгырткан. Ол амгы үеде дайынчы хөделиишкиннер шөлүнде Ада-чуртун камгалап турар.

Аржаанда кыргылда сезонун Аяс Сүрүнчүктүң өөнүң ишти Айлаш Салчак кады төрээннери-биле эгелээн. Олар Тываның алдарлыг малчыны, сумунуң «Энелер» чөвүлелиниң кежигүнү Мария Доржуевна Монгуштуң аалынга чедип, өшкүзүн кыргааннар.

«Социал керээ» программазының киржикчизи эге дээрезинде шээр малды хол хачызы-биле кыргып турган. Ам электрилиг мал кыргыыр машиналар кыргыкчыларның ажылын улам шапкынчыткан. Хой кыргыыр бригаданың ажылын чон бедии-биле үнелеп турарын суму чагырга чериниң удуртулгазы демдеглээн.

Аржаанчылар чаңгыс чер-чуртуунга база республикадан тускай шериг операциязында киржип турар дайынчыларга шериг албан-хүлээлгезин төлептиг күүсеткеш, онча-менди аал-оранынче чанып кээрин күзеп турар.