Аржаанның Ада-чурттуң Улуг дайынының киржикчилеринге тураскаалдың шөлүнде

Бии-Хем кожууннуң Аржаан суурда Ада-чурттуң Улуг дайынының киржикчилеринге тураскаалдың шөлүн чаагайжыдары-биле ажылдар уламчылап турарын чагырга чери дыңнаткан.

Объектини «Адыг» кызыгаарлаттынган харыысалгалыг ниитилел чаагайжыдып турар. Керээ езугаар тудуг ажылдарын июль 31-ге чедир доозар ужурлуг.

Тудуг бригадазында тус черниң алды чурттакчызы ажылдап турар. Афган дайынының хоочуну, Аржаан школазының күш-ажыл башкызы Олег Кызыл-оолдуң удуртулгазы-биле тудугжулар шөлдүң черин дескилээш, брусчатканы эптеп, чаткан.

Амгы үеде шөлдүң девискээрин херимнээринге белеткеп турар. Тураскаалдың плитказын чаартыр, Хүндүлел самбыразын база ооң кыдыгларынга сылдыс хевирин, дыштанып олурар сандайларны, фонарьларны тургузар, чырык кожар дээш кылыр ажыл ам-даа хөй.

Бо чылын «Чуртталга оран-савазы болгаш хоорай хүрээлели» национал төлевилелдиң боттандырылгазы-биле Тываның 19 муниципалдыг тургузуунда 30 хөй-ниити шөлүн чаагайжыдар.

Тывага шилиттинген төлевилелдерни боттандырынга федералдыг бюджеттен 100 сая рубльди тускайлаан. Республикага ук программа ажылдап эгелээнден бээр 145 хөй-ниити шөлдери чаагайжыттынган.