Аржаанның кышка белеткели эки деп санаттынган

ТР-ниң Чазак аппарадының төлээзи Татьяна Чамзога удурткан ажылчын бөлүк Аржаан сумузунуң социал объектилерин хынап көрген.

Бир дугаарында школа, уруглар садынга, фельдшер-акушер пунктузунга, көдээ культура одаанга четкен. Кышкы одалга сезону штат чуруму езугаар эртип турарын олар демдеглээн. Курлавырда 20 хонуктуң одаар чүүлү бар.

Ол ышкаш долу эвес мөөңнээшкинде дөрт хамаатының өг-бүлезинге үш-үш тонна хөмүр-дашты, оттулар ыяштарны чедирген. «Социал хөмүр-даш» төлевилелиниң алды киржикчизинге оттулар чүүлдү октябрь айда дүжүрген. Сумунуң чурттакчыларының 70 хуузу кыжын оттулар хөмүр-дажын белеткеп алганнар. Аржаанчылар кышка белеткелин уламчылап турар.

ТР-ниң өөредилге сайыдының бирги оралакчызы Владимир Монгуш школада эге класстарның өөреникчилерин изиг чем-биле хандырарылгазын хынааш, уругларга хоолулуг аъш-чемни белеткеп берип турарын көрген.

“Социал керээ” программаның киржикчилериниң ажыл-ижи-биле танышкан. Кызыл хоорайның чурттакчы чонну ажылга хаара тудар төптүң директору Амур Увангур сумуда күрүне деткимчези-биле эът болбаазырадыр биче будурүлгениң ээзи Алаш Ооржак база чараштаныр салоннуң ээзи Ай-кыс Ховалыг-биле ужуражып, күрүне деткимчезин алган улустарга үндүрүг төлээриниң дугайында тодаргайы-биле тайылбырлаан. Эгелеп чоруур сайгарлакчыларның ажыл-херээ элээн шуудай бергенин ол онзалап демдеглээн.

Ажылчын бөлүк Аржаанның кышка белеткелин эки деп түңнээн. Ол ышкаш суму чагырга чериниң удуртулгазынга социал-экономиктиг хөгжүлдезинге хамаарыштыр бүгү талалыг арга-сүмени берген.