Арзылаң мөгениң чырык адынга тураскааткан хүреш

Тываның Арзылаң мөгези Ким Седен-оолдуң чырык адынга тураскааткан республика чергелиг хүреш Өвүр кожууннуң төвү Хандагайтының Доржу Казакин аттыг стадионунга болуп эрткенин чагырга чери дыңнаткан.

Шыырак дээн 64 мөгениң ачыр-дачыр тудушканының түңнелинде Арзылаң мөге Айдың Монгуш (Улуг-Хем) шүглүп үнген. Кожуун чергелиг Начын мөге Кежик Шыырап (Чаа-Хөл) үжүүрлешкен. Үшкү-дөрткү шаңналдыг черлерде Чаан мөге Сайын-Белек Түлүш (Тес-Хем) биле Начын мөге Бады-Маадыр Самдан (Улуг-Хем).

Өвүр кожууннуң чагырга чериниң удуртулгазының мурнундан Ким Седен-оолдуң ада-иези Светлана Очут-ооловна биле Юрий Тюлюшовичиге база өөнүң иштинге онзагай спортчу хемчегни эрттиргени дээш өөрүп четтириишкин бижиктерин тывыскан.

Республика чергелиг хүрешти Ким Седен-оолдуң чоок кижилери бедик деңнелге эрттирген. Өвүр кожууннуң чону алдар-аттыг мөгезиниң чырык адын сактып, чоргаарланып чоруурлар.