Аът чарыштырып, арбай-хоорлап…

Чайгы дыштанылга лагерьлеринде «Төрээн чер хүнү» деп хемчеглер болуп эртип турарын ТР-ниң Өөредилге яамызы дыңнаткан.

Национал школа хөгжүдер институттуң болгаш Тываның Өөредилге яамызының ажылчын бөлүү-биле Эрзин кожууннуң «Отчугаш» болгаш Тес-Хем кожууннуң «Сайлык» лагерьлеринче үнүүшкүннү кылган.

Үнүүшкүннүң сорулгазы – республикада ажыттынган чайгы лагерьлерде «Төрээн чер хүнүн» кайы хире деңнелде эрттирип турары, оон аңгыда, вторник санында «Тыва дыл хүнүнде» уруглар чүнү билип ап турарын көөрү.

«Отчугаш» лагери «Төрээн чер хүнүн» девискээринде тиккен ак өгге Нарын сумузундан күш-ажылдың хоочуну, хөй-хөй башкыларның дагдыныкчызы –Раиса Аракчааны чалааш, тыва чоннуң культуразының болгаш езу-чаңчылдарының дугайында солун чугааны уругларга эрттирген.

Тыва дыл хүннеринде вторник санында аңгы-аңгы шимченгир тыва оюннар ойнап эрттирип турар. «Сайлык» лагери «Төрээн чер хүнүн» ам эрттирер деп турарын дыңнаткан.

Этнопедагогиктиг шинчилелдер лабораториязының ажылдакчызы Альбина Монгуш оолдар, уруглар-биле «Оол кижи болгаш кыс уруг 12-14 харлыында чүнү кылып билирил?» деп чугааны кылгаш, «Арбай-Хоор» деп ырыны флешмоб хевиринге эрттирген.

Уруглар кажык оюнунуң «Аът чарыштырар» хевирин улуг сонуургал-биле ойнааннар. Оюнну кыдыындан хайгаараан «аарыкчылар» база ойнакчыларны деткип, сагыш човап турган.

«Аъды» мурнап келген тиилекчилерге болгаш «аъды» сөөлүнде келген ойнакчыларга шаңнал бижиктерни тывыскан. Өөрүнчүг, демдеглексенчиг чүүл – кайы-даа дыштанылга лагерьлеринде уруглар тыва дылын эки билир, хостуг чугаалаары болган.