Чыргакы сумузунга Ойнаар-Тейниң эдээнде "Аътка мөгейиг" тураскаалды байырлыг байдалга ажыдып, республика чергелиг аът чарыжын үш аңгы салыгга эрттиргенин чагырга чери дыңнаткан.
Чыргакы сумузунуң Аът федерациязы болгаш эр чону деткип, спортчу хемчегни бедик деңнелге эрттирген.
Чаваа аъттар. 1-ги черде Сергек Биче-оол (Барун-Хемчик).
1,4 хемчээлдиг аъттар. 1-ги черде Долаан Монгуш (Чыргакы).
Улуг аъттар. 1-ги черде Орлан Монгуш (Чыраа-Бажы).
Тиилекчилер акша шаңналдарын, мал-маганны, өртектиг белектерни алган. Салыг бүрүзүнге "Тиилелгеже чүткүл" шаңналга төлептиглерни демдеглеп, аът шывыын тывыскан.
1,4 хемчээлдиг аъттар чарыжының тиилекчизи богбазын Чыргакының хөй ажы-төлдүг өг-бүлези Айдыс биле Айлаана Кууларларга белек кылдыр берген.
Келир чылын аът чарыжын эрттирери-биле Вячеслав Саттың өг-бүлезинге кубокту дамчыткан.