2025 чылда Тывада пассажирлер аргыштырылгазының доктаамал автобустары 2024 чылга деңнээрге 7,1 хуу хөй, азы 14,5 сая пассажирни аргыштырган.
Пассажирлер аргыжылгазы 9,0 хуу көвүдеп, 310,6 сая пассажир-километр болган. ТР-ниң Орук-транспорт яамызы 2025 чылда хөй-ниитиниң автомобиль транспортунуң ажылының түңнелдерин үндүрген.
Яамы Кызылдың мэриязы-биле кады хоорай маршруттарын хандырарынга «Чедингир хүрээлел» система-биле дериттинген 12 КамАЗ ВЕГА автобустарны садып алганы пассажирлер аргыштырылгазын көвүдедип, ол ышкаш 2025 чылдың марттан октябрьга чедир «Кызыл – Абакан – Кызыл» регионнар аразында маршруттуң рейстер санын неделяда чеди чедир улгаттырган.
Хоорайның автопарыгын чаартканы регионга 2025 чылда «Хөй-ниити транспортун хөгжүдер» федералдыг төлевилелдиң сорулгазын чедип ап, азы республиканың хөй-ниити транспортунуң парыгының негелде езугаар 60 хуузун чаарткан.
Республика девискээринде муниципалдар аразында пассажирлер аргыштырар 16 маршрут доктаамал ажылдап турар, оларның 11-и Кызылдың девискээринде чурттакчылыг черлерде болза, Барыын-Хемчик кожуунда ийи база муниципалдыг тургузуглар аразында үш маршрут ажылдап турар. «Кызыл – Абакан – Кызыл» регионнар аразында чаңгыс маршрут база бар.
«Туваавтотранс» КХН, «Автоколонна 17» КХН, «Авто-17» КХН бүдүрүлгелер, ол ышкаш ТР-ниң Орук-транспорт яамызы база Кызыл мэриязы-биле керээ чарган хууда сайгарлыкчылар пассажирлер аргыштырылгазын хандырып турар. Хуу сайгарлакчылар пассажирлер аргыштырылгазының хөй кезиин хандырган.
Амгы үеде ниитизи-биле 159 автобус пассажир аргыштырылгазынче хаара туттунганган, оларның 70 хуузу «Угаанныг транспорт» системазында кошутнган. Арткан автобустар системаже ам коштунар, ол ажылдар ноябрьга чедир доостур ужурлуг.