«Автопоезд» акцияның киржикчилери немежип турар

Өвүр кожууннуң чагырга даргазының хүлээлгезин күүседип турар Айдыс Куулар Ниити-российжи улусчу фронтунуң болгаш «Россияның демир-оруктары» ажык акционерлиг ниитилелдиң «Автопоезд» деп чарлаан акциязын деткип турарын дыңнаткан.

– Өвүр кожууннуң чонунуң мурнундан чарлаттынган «Автопоезд» акциязынга катчып, тускай шериг операциязында киржип турар чангыс чер-чурттугларывыска автомашинаны садып чорударын шиитпирлеп алдывыс.

Чогуур ужурлуг херек чүүлдер-биле хандырылгалыг автомашинаны садып бээривиске, маадырларывыска дыка улуг деткимче болур. Дайынчы хөделиишкиннер шөлүнде Ада-чуртун камгалап турар оолдарывыска бүзүрээр бис, оларны деткиир бис. Тиилелге биске келир. Тыва чонувус, өвүржүлер шупту демниг бис! – деп, Айдыс Куулар соцчеткилерде бижээн.

Тывада чарлаттынган Чоннуң чаңгыс эп-сеткилиниң чылы республиканың чурттакчыларын улам-на демнештирип турар.

Баштайгы автомашиналарны «Восток» кызыгаарлаан харыысалгалыг ниитилелдиң коллективи, Кызыл кожууннуң чурттакчылары берге оруктарны эртип шыдаар, дайынчы хөделиишкиннерге ажыглап болур «УАЗ Хантер» маркалыг автомашиналарны тускай шериг операциязында киржип турар дайынчыларга чедирери-биле дамчыткан.

Украинаже чорудар автомашиналарны апрель 10-да Абакан хоорайда демир-орук станциязынга чедирер ужурлуг. Улаштыр “Россияның демир-оруктары” акционерлиг ниитилел поездиге чүдүрүп алгаш чоруптар.