Барыын-Хемчик кожууннуң Аянгаты сумузунуң чурттакчыларының үрде манааны чаа көвүрүг тудуу эгелээн. Аян-Хем кежир амгы шагның негелделеринге дүгжүп турар, айыыл чок ийи көвүрүгнү тудар талазы-биле күрүне садыглажыышкыннарын “Восток” КХН ойнап алгаш, тудуг ажылдарын чорудуп эгелээни ол.
Бо хүнде көвүрүгнүң тавактарын тургузар болгаш ону быжыглаар ажылдар чоруп турар. План езугаар хүлээникчи орук-тудуг организациязы көвүрүглерни чыл төнчүзүнге чедир ажыглалче киирер.
Аяңгаты суурнуң кожуун-биле аргыштырар Аян-Хем кежир ыяш көвүрүүн эрткен чүс чылдың тозан чылдарында туткан. Орукту суг чуй шааптарга, аяңгатыжылар Суглуг-Ой таварааш, 25 километр орукту тырыкыландыр эрткеш, Шекпээр суурга келгеш, улаштыр кожуун төвүнге чедир 12 километр ояр оруктап аргыжып турган.
Маңаа чаа көвүрүгнү тудары-биле төлевилел-дөзевилел документациязын кылып, Орук-транспорт комплекизиниң яамызынче чагыгны киирген турган.
