Он сес хардан өрү назылыг кижи бүрүзүнге чурагайлыг технологияларның адырынга херектиг мергежил чедип алыр арганы берип турар Ажаалга банкызының өөредилге төлевилели – «21-ги школа» чурагайлыг технологиялар школазы республикада ажылдап эгелээнин Тываның Баштыңы Владислав Ховалыг дыңнаткан. Россияның Президентизи Владимир Путинниң далагазы-биле, бо төлевилел боттандырып эгелээн.
Владислав Ховалыг «21-ги школаның» ажылын Ажаалга банкызының эгелээни-биле Тыва регионнуң чурагай күчүзүн хөгжүдеринге чугула базымны кылыр деп демдеглээн: «Төлевилел бистиң чурттакчыларывыс мурнунга, ылаңгыя аныяктарга онзагай аргаларны ажыдар – бо дээрге ИТ-адырга бодун көргүзер, регионга аныяк кадрларны быжыглаар, а ол ышкаш республиканың чурагайлыг өскерлиишкининге чугула кезек адыр-дыр».
«21-ги школаның» доозукчулары регионга технологтуг хөгжүлдениң шимчедикчилери апаарынга, Тываның чурагайлыг, шапкын, алыс кедилиг келир үезин хевирлээрлер деп регоннуң удуртукчузу бүзүрелин илереткен.
Кызылда школаның өөренир чери «Сылдысчыгаш» төвүнүң девискээринде турар. «21-ги школаның» өөредилгезин 2026 чылдың часче планнаан, амгы үеде өөредилге программалары эртип турар.
«21-ги школаже» дужаап кирер дизе, сайтыга билдириишкинни киирип, боданырынга, сайгарарынга болгаш сактып алырынга онлайн-оюннарны эрттирип, а ол ышкаш сөөлгү шилилде чада – «бассейнни» эртер.
«21-ги школаның» киржикчилери өөредилге үезинде төлевилел езугаар база төлевилелге хамаарышпас өөредиглерни шилип ап болур. Төлевилел программаларының аразында бэкенд, фронтенд, мобильдиг ажыл, GameDev, а төлевилелге хамаарышпас программаларда: кибер-айыыл чок чорук, Data Science, сайгарылга системазы, бизнес-сайгарылга, DevOps, сервистерниң үзүктел чок ажылдаарын хандырар, программа хандырылгазынга тестилер бар. Кижи бүрүзү боттарының темпизин, өөренир оруун шилип алыр. Ооң аайы-биле өөредилге тос айдан ийи чылга чедир уламчылаар.
Үш ай стажировка эрттери – «21-ги школа» программазының чарылбас кезээ. Чамдык киржикчилер доозар мурнунда, ажылче чалалгаларны алыр. Барык шупту доозукчулар чурттуң улуг ИТ-компанияларында болгаш стартаптарында ажылдап турар.
Өөредилге чери амгы үеде ол-ла методиканы ажыглап тургаш, Тывадан башкыларны чурагай мергежилдеринде өөредип турар. Башкыларга дөрт модульдан тургустунган өөредилге программазы дөрт хонук уламчылаар. Ол немелде профессионал өөредилге системазынга ажылдаар амгы үениң херекселдерин шиңгээдир арганы бээр. Кижиже угланган педагогиканың, бөлүктү хаара тудар үндезиннерниң, сагыш-сеткил хайныышкыны болгаш аныяк өскен-биле ажылдаарының өске-даа аргаларын башкылар билип алыр.
Ажалага банкызының Кызылда салбырының удуртукчузу Алина Таспанчик, школаже кирерде ооң мурнунда билиглери, ажылдаан арга-дуржулгазы, программа-биле ажылдап билири база диплому бар-чогу хамаарылга чок деп демдеглээн. Өөредилге амгы үеде рыноктуң хереглелинче угланган таарымчалыг болгаш үргүлчү сайзырап турар ада-чурттуң чурагайлыг өөредилге шөлүнге болуп эртер.
Амгы үеде Россияда, «21-ги школаның» өөредилге шөлдери Москва, Казань, Новосибирск, Сургут, Великий Новгород, Якутск, Ярославль, Магас, Магас, Магадан, Анадырь, Мурнуу-Сахалин, Челябинск, Нижний Новгород, Липецк, Уфа, Чаа Уренгой, Омск, Волгоград, Бурятия, Пермь, Ставрополь болгаш Тывада ажылдап турар. Чоокку чылдарда чурттуң элээн каш регионнарынга школаның өөредилге шөлдерин ажыдары планнаттынган.
Өөрениринче билдириишкинни школаның дараазында сайтызынче чорудар: 21-school.ru