Ажы-төлдүг өг-бүлелер чаа төлевирлерин ап эгелээн

Россияның Социал фондузунуң Тывада салбыры ажы-төлдүг өг-бүлелерге чаа деткимче программазынче билдириишкин киирген ада-иелерге бирги төлевирлерни шилчиткен.

Июнь 4-ке чедир ниитизи-биле 18 сая ажыг рубль түңнүг өг-бүле төлевирин 576 билдириишкин киирикчизинче чоруткан. Россияның Президентизи Владимир Путинниң даалгазы-биле болгаш «Россия Федерациязының ийи азы оон хөй ажы-төлдүг хамаатыларынга чылдың-на өг-бүле төлевириниң дугайында» № 179-ФЗ федералдыг хоойлу езугаар чылда чаңгыс катап төлээр ол деткимче хемчээ доктааттынган.

Россияның Социал фондузунуң Тывада салбыры өг-бүле төлевириниң дугайында билдириишкиннерни июнь 1-ден хүлээп эгелээн. 18 хар четпээн ийи азы оон хөй ажы-төлдүг, оларның аразында хүндүскү салбырларда өөренип турар 23 хар четпээн студентилерлиг ада-иелер күрүне ачы-дузалары порталы таварыштыр, Хөй ажыл-чорудулгалыг төвүнүң, Россияның Социал фондузунуң регионалдыг клиент албан черлеринге билдириишкинни киирип болур.

Амгы чурум езугаар 10 ажыл хүнүнүң дургузунда шиитпир хүлээп алдынар, а акша-хөреңгини шилчидеринге база беш ажыл хүнү көрдүнген. Социал фондунуң бедик чурагайжыдылгазы болгаш ооң сайзыраңгай ачы-дуза системазының ачызында, кыска хуусаа дургузунда төлевирни доктаадыры болгаш төлээри хандыртынган.
Өг-бүле төлевирин алыр билдириишкинни колдуунда боттары киирер, а арткан медээлерни Социал фонд салбыры боду чыып, хынаар.

2025 чылда кижи санынга онааштыр орулгазы амыдырап-чурттаарының кудуку хемчээлинден 1,5 катап хөй эвес (26865 рубль) ийи болгаш оон хөй ажы-төлдүг ажылдап чоруур ада-иелер чылда чаңгыс катап төлээр өг-бүле төлевирин алыр. Төлевирни шиитпирлээрде өг-бүлениң өнчү-хөреңгизин база өөренип көөр.

Тываның чурттакчылары төлевирниң дугайында Россияның Социал фондузунуң сайтызындан билип ап болур: sfr.gov.ru/grazhdanam...
Россияның Социал фондузунуң чаңгыс аай харылзаа төвүнүң 8-800-100-001 дугаарындан (регионалдыг шугумнуң ажылдаар чуруму: понедельник-четвергте 09:30 шактан 18:00 шакка чедир, пятницада 09:00 шактан 16:00 шакка чедир) регионнуң чурттакчылары немелде тайылбырны ап болур.