Ажыктыг медээлер «киоскизи»

Кызыл хоорайның Чонну ажылга хаара төвүнде «информация киоскизи» ажылдап эгелээн. Тываның чурттакчылары Красноярск крайның, Хакасия база Тываның улуг инвестиция төлевилелдеринде ажылчын олуттар бар-чогунуң дугайында чугула медээни терминал таварыштыр билир алыр аргалыг.

«Демография» национал төлевилел-биле ажылдап кылган "информация киоскизинден" республиканың чурттакчылары "Енисей Сибиринде" хостуг ажылчын олуттар дугайында билип ап болур.

Ол төлевилелди, Тываның база кирип турары, «Енисей Сибири» комплекстиг инвестиция төлевилелиниң кадрлар курлавырын калбартыр сорулгалыг тургускан. Ындыг инфомат «Россияда ажыл» чаңгыс аай чурагайлыг шөлчүгешче шилчээни-биле тургустунуп, «Енисей Сибири» кадр курлавырының девискээрин калбартыр аргалыг болган.

Республиканың найысылалында кадрлар төвүнге келген кижилер залда тургускан терминал таварыштыр хостуг ажылчын олуттар, хөй-ниити ажылдарының, мергежилдерге өөренириниң дугайында ажыктыг медээлерни, оон аңгыда юридиктиг консультацияларны база алганнар. «Киоскиниң» ажылы ооң-биле кызыгаарлаттынмас. Чонну ажылга хаара тудар программаларның дугайында роликтерни доктаамал көргүскен информация экранын база аскан.

– «Информация киоскизин» ажылдатканы – Россияның Президентизи Владимир Путинниң ажыл чок чорук-биле демисежир дээн даалганы күүседиринге Тыва Республикада кылган бир чугула базым болур. Чаа чүүлдүң сорулгазы – «Енисей Сибириниң» регионнарында хостуг ажылчын олуттар дугайында ажыл дилээн кижиге дыңнадырындан аңгыда, мергежилдиг база харыысалгалыг ажылдакчы хереглээн тодаргай ажыл берикчизинге ону дамчыдарында. Ажылдакчыга-даа, ажыл берикчизинге-даа, күрүнеге-даа ол дыка эптиг – деп, коммерцияга хамаарылга чок автономнуг организацияның чиңгине директорунуң оралакчызы Максим Говорушкин тайылбырлаан.

– Бо техниканы ажыглаары белен. Гуманитарлыг угланыышкынныг специалистерге, инженер база ажылчын мергежилдиглерге, ол ышкаш удуртукчуларга шөлчүгеш ажык. Тускай онлайн-шөлчүгешке төлевилелдиң шупту киржикчилери-биле кады бүрүткедир; кылган майыкка резюмени долдурар; профессионал угланыышкынын тодарадырынче угланган онлайн-тестээшкинни ол-ла дораан эртер. А ажыл берикчизи кандидаттың эртем-билии, арга-дуржулгазы, амы-хууда шынарларын бижээн отчетту ол үеде ап алыр. Шилилдени эрте берген ажыл дилекчизи «Енисей Сибири» комплекстиг инвестиция төлевилелиниң киржикчизи апарып болур – деп, Кызыл хоорайның чонну ажылга хаар тудар төвүнүң удуртукчузу Амур Увангур чугаалаан.

Ук хемчегге ТР-ниң Чазак Даргазының оралакчызы Менги Кара-оол биле «Енисей Сибирин хөгжүдер корпорация» коммерцияга хамаарылга чок автономнуг организацияның чиңгине директорунуң оралакчызы Максим Говорушкин тускай стендиниң ажыдыышкынынга киришкен. Оон аңгыда, Кызыл хоорайның кадрлар төвүнүң удуртукчузу Амур Увангур, ТР-ниң Күш-ажыл яамызының чонну ажылга хаара тудар килдизиниң начальниги Александр Монгуш, «Межегейхөмүр» БК» КХН-ниң чиңгине директору Игорь Трандин болгаш өскелер-даа киришкеннер.