Ажылдавайн турар пенсионерлерниң пенсиялары 4,8 хууга өзер

Тыва Республикада ажылдавайн турар пенсионерлерниң камгадылга пенсияларын 2023 чылдың январь 1-ден 4,8 хууга өстүрер.

Россияның Социал фондузунуң Тывада салбыры тус-тузунда төлевирниң доктааттынган хемчээли – 7567 рубль база пенсия хуузунуң түңү – 123 рубль 77 копеектен камгаладылга пенсиязы тургустунарын дыңнаткан. Өзүлдениң хуузу шуптузунга дөмей, ынчалза-даа немелдениң хемчээли кижи бүрүзүнге аңгы – индексация мурнунда пенсиязының хемчээлинден ол хамааржыр.

Назылап кыраанындан ажылдавайн турар пенсионерлерниң камгадылга пенсиязын өстүрген соонда, пенсионер кижиге-ле немелде аңгы болур болгаш, ап турар пенсиязының хемчээлинден хамааржыр.

Тывада ажылдавайн турар 48 муң пенсионерниң пенсиязын өстүрер. Апрельде социал пенсияларны (чемгерикчизин чидиргениниң база инвалид болганының чамдык пенсияларын) өстүрер.

Ажылдап турар пенсионерлер күш-ажылчы ажыл-чорудулгазын соксаткан соонда, чаа хемчээлдиг пенсияны алырын Россияның Социал фондузунуң Тывада салбыры тайылбырлаан. Ажылдан хосталган соонда, ажылдап турган үезинде болуп турган индексацияларны катай санаан камгаладылга пенсиязын ажылын соксаткан айның соонда, 1-ниң хүнүнден эгелеп төлээр.