Тываның Сайгарлыкчы чорукка деткимче көргүзер фондунуң тургусканы «Азия төвү» этноковоркинг төвүнүң шеверлери тускай шериг операциязында киржип турар дайынчы оолдарга «чажыртынар» четкилерни кылып турар.
Кызыл кожууннуң «Эврика» немелде өөредилге төвүнүң башкызы Кара Ондар ук ажылды удуртуп турар.Төптүң шевер он беш башкызы, оларның өөреникчилери – авалар бөгүн ийи четкини шарып кылган.
– Тускай шериг операциязы эгелээнинден бээр дайынчы оолдарывысты деткип тур бис. Баштай өлчей удазыны-биле каастаан 300 таалыңны, дараазында 250 хөректээшти, 500 боорзак хавын даарап, теве дүгүнден 315 курну, чылыг бөрттерни дээш оон-даа өске херек чүүлдерни чоруттувус.
Четки кылыр материалдар-биле Улусчу фронтунуң Тывада салбыры хандырып турар. Ол ышкаш оран-саваны база аңгылап берди. Дайынчы хөделиишкиннер девискээринде шевер башкыларның оолдары, кады төрээннериниң болгаш дөргүл-төрелдериниң оолдары база киржип турар.
Кызылда 55-ки тускай мото-адыгжы (даг) бригаданың дайынчылары бистиң-биле ужуражып кээп чорааш, даараан таалыңнарывыс болгаш чылыг хептеривис дээш четтиргенин илереткени дыка эргим болду. Олар биске четкилерни кылырын база тайылбырлап берди. Четкиге пөстү быжыглап тургаш шаарыыры чугула.
Бир четкини дөрт шак дургузунда кылыр. Ооң дооразы дөрт метр, узуну 3,75 метр. Четкилер кылырын бир дугаар шенеп турарывыс бо. Чогум ажыл ындыг-ла кончуг берге эвес. Тускай шериг четкизи херек, ону ногаан өңнүг, аргада бүрүлер хевирлиг пөс-биле шарып тур бис. Кайы хире четки кээр болдур, ону шуптузун кылыр бис. Оолдарывыс чурттап турар черин, машина-техниказын “чажыртынар” четкилер-биле шып алырга, билдирбес болуп, камгалаарынга бүзүреливис улуг – деп, шевер башкы ажылын таныштырды.
Төптүң шеверлери – Тываның херээженнер эвилелиниң кежигүннери. Олар кылган четкилерин ээлчеглиг ачы-дуза чүъгү-биле чорудар дээш график езугаар шудургу ажылдап турар. Бөлүктүң бир кезээ эртенги шакта, өскелери дүъш соонда кээр. Хоочуннар харын четкилерни хүнзедир кылыр аргалыг.
Шевер башкылар «Автопоезд» акциязы-биле шериглеривисче чоруткан орук чок черлерни эртип шыдаар, тускай чепсеглеттинген 40 автомашиназын оларның кылган четкилери-биле шып алырга, эскертинмес болурунга идегеп турар.
«Азия төвү» этноковоркинг төвүнүң шеверлери өлчей удазыны-биле каастаан таалыңнарны йөрээл сөстери-биле домнавышаан, дүн-хүн дивейн даарап турганнар. Ол ышкаш пандемия үезинде 5000 муң ажыг камгалал маскаларны база даарааннар.
