Бүгү чүүлдү тиилелге дээш: Ээлчеглиг дузаламчыны фронтуже чоруткан

Тыва тускай шериг операциязының баштайгы хүннеринден тура ачы-дуза чыылдазында идепкейлиг киржип турар.

«Улусчу фронт. Бүгү чүүлдү тиилелге дээш!» төлевилелдиң чорудуу-биле дузаламчыны чүгле дайынчыларга эвес, а хостаткан девискээрлерниң тайбың чурттакчыларынга чорутпушаан хевээр.

Россияның Маадыры Чалым Чүлдүм-оол дайынчы хөделиишкиннер шөлдеринде мурнуку одуругда чаныш-сыныш чок албан-хүлээлгезин күүседип турар чаңгыс чер чурттугларын деткип турар республиканың чурттакчыларынга болгаш эки турачыларынга четтиргенин илереткен.

– Чоннуң деткимчези дайынчыларга доң чугула. Фронтуга чаңгыс чер чурттугларывыстың деткимчези бистиң кайывыстың-даа хей-аъдывысты көрүдүрүп турду. Тиилелгени чоокшулаштырарынга үнелеттинмес үлүг-хууңар дээш четтирдивис – деп, Россияның Маадыры чугаалаан.

Бо удаада Тываның Чазааның, Дээди Хуралдың, Ниити-российжи улусчу фронтунуң Тывада салбырының, күрүне албан черлериниң, сайгарлыкчыларның болгаш чурттакчыларның деткимчези-биле автомобильдерни, квадроциклдерни, мотоциклдерни, камгаланып шыптынар четкилерни, тускай техниктиг херекселдерни, эм-таңны, аъш-чем аймаан болгаш өске-даа чүүлдерни чоруткан.