«Улусчу фронт. Бүгү чүүлдү тиилелгеже!» төлевилелдиң чорудуу-биле Тывадан тускай шериг операциязында киржип турар дайынчыларга база хостаттырган девискээрлерде тайбың чурттакчыларны деткиир ачы-дуза чыыр кампания Тывада эгелээн.
Тываның күрүне университединиң «Кады бис» штавының тускай шериг операциязында киржип турар дайынчыларга ачы-дуза чыыр пунктузунче ээлчеглиг чүъктү республиканың чону дамчыдып турар. Улусчу фронтунуң төлээзи Ольга Хомушку дээди өөредилге чери доктаамал ачы-дуза чүъгү чыыр оран-саваны аңгылап берип турарын дыңнадып, күзелдиг улусту акцияга идепкейлиг катчырынче кыйгырган.
Тываның гидрометеорология база долгандыр хүрээлелге мониторинг төвү доктаамал деткимчени көргүзүп турарын албан чериниң директору Анатолий Ляпин чугаалааш, дайынчыларны чуүгле тиилелгелиг чанып кээрин күзээн. Бо удаада бензин-биле ажылдаар генераторну, «удуур-шоодайларны» хүлээдип, акша-хөреңгини шилчиткен. Төптүң аңгы-аңгы булуңнарында метеостанцияларының ажылдакчылары база үлүг-хуузун кирип турарлар.
«Гаруда» садыг төвүнүң директору Сергек Сарыглар «Анчинск» деп дайынчы кыйгы аттыг чаңгыс чер чурттуунуң чагыын күүседип, ужудукчу чок аппараты хүлээткен.
Тускай шериг операциязында киржип турар дайынчының ада-иези Альберт Кыргыс биле Чечек Монгуш медицина дериин, чаңгыс катап ажыглар чоорганнар дээш оон-даа өске чүүлдерни эккелген. Оларның оолдарының бирээзи – Виталий Кыргыс 2022 чылда тускай шериг операциязының үезинде коргуш чок дайынчы албан-хүлээлгезин эрес-дидими-биле күүседип тургаш, амы-тынындан чарылган.
Кижи бүрүзү тиилелгени чоокшулаштырар дээш үлүг-хуузун киирип болур, ынчангаш күзелдиг улус шыдаар шаа-биле ачы-дузазын көргүзер аргалыг.
Ачы-дуза чыылдазын Тываның Чазаа болгаш Улусчу фронтунуң регионалдыг салбыры удуртуп турарын сагындыраал.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Тыва эки турачылар кудумчузу, 3 («Норзин» Садыг төвү), Ленин кудумчузу, 5 (Тываның күрүне университединде «Кады бис» штавы. Харылзажыр телефоннары: 8 (39422) 2-10-50, 2-11-50.
Чуруктарны Ада Тюлюш тырттырган
