Тускай шериг операциязының девискээринде Тывадан шериг албан-хүлээлгелиглеринге кышкы ачы-дуза чүъгүн хевирлээр кампания доозулган.
Тываның Чазаа бо удаада доңурган эътти чорударын шиитпирлээн. Бо хүнге чедир республика 3,5 тонна хой, инек, сарлык болгаш аът эъдин чыгган. Кызылдың оң талакы эриинде Правобережная кудумчузунда көдээ ажыл-агый рыногунуң удуртулгазы чаңгыс эвес удаа эътти оонактап, деткимчезин көргүзүп турарын айтыры чугула.
Тываның көдээ ажыл-агый техникумунуң сургуулдары, шериг болгаш ада-чуртчу клубтуң кежигүннери көдээ ажыл-агый рыногунуң ажылдакчызынга кескен эътти хаптаарынга, чүдүржүр ажылдарга дузалажып келгеннер. Келир үениң мал эмчизи Чечен Седип-оол фронтуда дайынчы акылары онча-менди чанып кээрин күзеп турар.
Ниити-российжи улусчу фронтунуң регионалдыг күүсекчи комитединиң даргазы Саима Далчинниң дыңнатканы-биле алырга, кышка чыылдага республиканың шупту муниципалитеттери идепкейлиг киришкен.
– Бөгүн ачы-дуза чыылдазының сөөлгү хүнү. Ийи хүннү чүъктү хааржактап, аайлап, бижиктерин чыпшырар кылдыр арттырып алган бис. Дайынчыларның чагыын езугаар шериг кезектериниң аайы-биле чүъктү бээр.
Тываның Чазааның деткимчези-биле 20 тонна чүък чыгдынган. Кышкы ачы-дуза чүъгүнде мототехника, генераторлар, кургаг феннер, чажыртынып шыптынар четкилер, оңгуларга ажыглаар лаалар, демир суугулар, чылыг идик-хеп, фронтуда шериглерге херек аңгы-аңгы техниктиг дериг-херекселдерни белеткээн. Баштайгы чүъктү Луганск Улус Республиканың Свердловск хоорайга чедирер – деп, ол медеглээн.
Сесерлиг сумузунуң девискээринде, Ак-бедик деп черде, хууда мал-маганын тудуп турар Артур Чаш-оол оонактап каан аът эъдин дамчыткан. Ол ооң мурнунда-даа дайынчы хөделиишкиннер девискээринде чаңгыс чер чурттугларынга деткимчезин көргүзүп турган.
– Тускай шериг операциязында киржип турар дайынчы дуңмаларымны деткип, доңургаш, бичииледир кезин каан семис аът эъдин дамчыдып тур мен. Дайынчы хөделиишкиннер девискээринге шериг оолдарга белен пашче сугар кылдыр белеткээним ол. Чаңгыс чер чурттугларымга Тиилелгелиг, каң кадык чанып кээрин күзээр-дир мен – деп, малчын чугаалаан.
Кызылдың 7 дугаар школазының өөреникчилери ачы-дуза акцияларының доктаамал киржикчилери. Бо удаада оолдар биле уруглар дайынчы акыларынга Чаа чылдың чигирзиг белектерин, чылыг хепти болгаш чаагай күзээшкиннерлиг чагааларны ТывКУ-да «Кады бис» деп эки турачылар штавынга хүлээткен.
Ол ышкаш Тываның Камбы-Лама эргелели мотоциклди, Дээди Хуралдың депутаттары тускай шериг операциязында мурнуку одуругда дайылдажып турар дайынчыларга ээлчеглиг чүъгүн дамчыткан. Депутат Ролан Ооржак дайынчыларның Тиилелгеже чүткүлүн улам күштелдирип, деткимче көргүзерин уламчылаарын дыңнаткан.
ТывКУ-нуң кижизидилге талазы-биле проректору Остап Чооду Ниити-российжи улусчу фронт биле дээди өөредилге черинде штаб демнежип, дайынчыларга херек чүүлдерни чыып турарын дыңнаткан. Штабта техниктиг дериг-херексел, демир суугулар, чылыг идик-хеп, чажыртынып шыптынар четкилер, конфет-чигирни дээш оон-даа өске чүүлдерни чыгган. Университеттиң студентилери тургускан график езугаар хоорай, кожууннардан келген чүъктү хүлээп турган.
Тываның Чазаа «Бүгү чүүлдү Тиилелгеже!» федералдыг төлевилел-биле кампанияны чорутканын сагындыраал. Чыгдынган чүъктү чедер черинге чедир 20 болгаш 5 тонна чүдүрер ийи улуг чүък машиназынга чедирер.
Чуруктарны Буян Ооржак тырттырган
