Бүгү Моолдуң Наадымынга тыва, бурят, калмык мөгелер база хүрежир

Бо чылдың Бүгү Моолдуң Наадымынга төөгүге турбаан болуушкун – мөге хүрежинге өске күрүнелерден мөгелер база киржири болур.

Сөөлгү медээлерден билдинип турары-биле аңаа Россияның 3 региону – Тыва, Бурятия, Калмыкиядан база Кыдаттың Иштики Моол автономнуг районундан мөгелерни Моол күрүнениң Наадым хүрежинче чалаан болуп турар. Оларның иштинден эң хөй даштыкы киржикчилер Тываның мөгелери болур.

Тываның адын камгалап чоруур мөгелеривистиң баш бурунгаар даңзызынче:
1. Монгуш Аяс, Тываның Күчүтен мөгези;
2. Түлүш Сайын-Белек, Тываның Чаан мөгези;
3. Монгуш Айдамир, Тываның Арзылаң мөгези;
4. Монгуш Сылдыс, Тываның Арзылаң мөгези;
5. Кара-Сал Седен-Очур,Тываның Арзылаң мөгези;
6. Монгуш Айдың, Тываның Арзылаң мөгези;
7. Монгуш Алексей, Тываның Хартыга мөгези;
8. Одай Алдын-Сай, Тываның Начын мөгези;
9. Ооржак Кежик,Тываның Начын мөгези;
10. Хомушку Эртине, Кожуун чергелиг Начын мөге;
11. Монгуш Мерген, Кожуун чергелиг Начын мөге;
12. Шыырап Кежик, Чаа-Хөл;
13. Куулар Мөнге-Эртине, Чөөн-Хемчик;
14. Мижит-Доржу Сайын, Улуг-Хем;
15. Шойдун Субудай, Улуг-Хем, кирип турарлар.
Оларның тренер-башкылары: Куулар Каң-Демир, Донгак Кайгал-оол; Сүктер Буян.

Бүгү Моолдуң Наадымынга хүрежир тыва мөгелерниң даңзызын бүгү талазы-биле деңзигүүрлеп тургаш тургускан.

Мөгелерниң ажыл-амыдыралының аайы-биле болгаш Россия-Моол күрүне кызыгаары эртер чөпшээрели бар-чогундан бээр даңзы тургузуп тургаш өөренип көрген. Ол ышкаш даштыкыже үнер паспорду бар-чогу база улуг рольдуг болган.

Моолдуң Наадымынга хүрежир тыва мөгелерниң баш бурунгаар тургускан даңзызы Моолдуң Наадымы болур хүнге, июль 11-ге, чедир өскерли берип болур.

Тыва мөгелерниң Моолдуң Наадымынга хүрежир дээш, Улан-Батор чедер-кээр болгаш, аңаа удуур-чыдар, аъштанып-чемненир чарыгдалдарын Тыва чазак хүлээнип алган.

Ынчангаш чүгле Тываның эвес, Улуг Россияның адын база камгалаар мөгелеривиске эки белеткенгеш, Моолдуң Наадымынга чедиишкинниг киржирин тыва чон күзеп, манап орар.

Мерген КЫРГЫС