Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Новосибирск хоорайда мурнакчы российжи бүдүрүлге – «Российжи электроника» холдингиниң иштинде «Новосибирскиниң радиокезектер заводу «Оксид» акционерлиг ниитилелге аалдап четкен.
Бүрүн эргелиг төлээ бүдүрүлгениң цехтерин кезип, ооң хөгжүлдезиниң келир үезин комбинаттың удуртулгазы-биле сайгарган. 1952 чылда тургустунган бүдүрүлге Воронежтиң «Электросигнал» комбинадының конденсаторлуг корпусунуң баазазындан 1941 чылда Новосибирскиже көжүп келген. Бодунуң тургустунганындан бээр бүдүрүлге тускай, ийи талалыг болгаш хамааты продукцияның 150 ажыг хевирлерин ажылдап кылгаш, бүдүрген.
Амгы үеде ол долу бүдүрүлге ажылын чорудуп турар – эртем-шинчилел, шенелде-конструктор болгаш бүдүрүлге салбырларлыг. Белен продукцияны бүдүн Россияга болгаш чоокку даштыкы чурттарже сөөртүп турар. Үлетпүр адырының 650 ажыг компаниялары болгаш бүдүрүлгелери доктаамал чагыкчылар санында.
«Оксид» НРЗ» АН-ның чиңгине директору Лев Носенко 2024 чылда комбинатты алгыдып тура, «Техниктиг эде тургузуушкун» төлевилелин ажылдадып, бүдүрүлгени чаартырын, бүдүрүкчү бедик технологияларны киирерин дооскан деп, бүрүн эргелиг төлээге чугаалаан. Ооң ачызында бедик мергежилдиг 100 ажылчын олуттарны тургузуп, бүдүрүлге шөлдерин элээн калбартып, комбинаттың үш шугумун чаа дериг-херекселдер-биле хандырган.
Бүрүн эргелиг төлээ бүдүрүлгеде күрүнениң импорт солуур программазының чорудуун база таныжып көрген. «Оксид» НРЗ» АН-ның специалистери технологияларны сайзырадырының эртем-шинчилел болгаш шенелде-конструктор ажылын чорудуп турар. Ындыг ажыл Новосибирскиниң күрүне университеди-биле кады тургускан Электроникага композиттиг материалдарның аныяктар лабораториязында чоруп турар. Сибирьниң эртемденнери-биле кады чаа функциялыг материалдары ажылдап кылырының дилээшкининде чоруп турар.
Анатолий Серышев радиоэлектроннуг үлетпүр адырында студентилерни, дээди өөредилге черлериниң доозукчуларын болгаш ортумак тускай өөредилге черлерин хаара тудары-биле бүдүрүлгеде системалыг ажылды үнелээн. Тускай мергежилдиг аныяк ажылдакчыларны дагдыныкчылар өөредип, чугула чүүлдерни практика кырынга шиңгээдип алырынга дузалажып турар. Бүдүрүлгениң техниктиг баазазында өөредилге төвүн ажыдар төлевилелди эгелеп, ынаар студентилерни хаара тудар сорулгалыг программаларны ажылдаткан. Завод 2025 чылдан эгелеп «Профессионалитет. Машина тудуу» программаже кирген.
Россия Федерациязының Президентизиниң айытканы национал сорулгаларын чедип алырынга заводтуң ажылдакчыларының ажылы чугула деп, бүрүн эргелиг төлээ демдеглээн. «Бүдүрүлгеде өскерлиишкиннерни сан-чургайлар көргүзүп турар: ажылдакчылар санының көвүдээни, орулганың өскени, продукцияның чаа хевирлерин үндүрүп эгелээнин. Бүдүрүлге улгадып, технологиялар чаартынганы көскү. Россияның Президентизиниң сорулгаларын чедип алыр дээш, технология талазы-биле тергииделивисти быжыглаар бис» – деп, Анатолий Серышев чугаалаан.
Ада-чурт үлетпүрүн хөгжүдеринге, чурттуң камгалалын быжыглаарынга улуг үлүг-хуузун кииргени дээш, бүдүрүлге ажыл-чорудулгазынга бедик көргүзүглерни чедип алганы дээш, бүрүн эргелиг төлээ заводттуң коллектвинге өөрүп четтириишкинниң бижиин тывыскан.
