Бай-Дагга “Эзирлерниң уязын” тудар

Эрзин кожууннуң Бай-Даг сумузу 1300 хире чурттакчылыг, аныяктарның саны – 480. Бо чылын көдээ культура бажыңының чылыдылга системазын чаартып, биче хемчээлдиг спорт залын тудуп, кудуктарны немей кылыр.

Бай-Даг сумузунуң чагырга чериниң даргазы Аида Ломбу @tmgnews17 бо чылын чаартылгалар дугайында дыңнаткан.

– Бо чылын культура бажыңының чартык кезииниң септелгези планнатынган. Ук оран-савага алдан чылдарның дургузунда септелге чоруттунмайн турган. ТР-ниң Культура яамызының шугуму-биле чылыдылга системазын чаартыр. Чыккылама сооктар үезинде сумуга агаарның соогу 57-58 градустан куду бада бээр болгаш оран-сава иштинге орар аргажок апаар, дыка соок. Ийиги каътта ном саңының соңгалаары хыраалай бээр. Культура бажыңының септелгезин июнь айда эгелээш, кышкы одалга сезонунга чедир доозар.

Ол ышкаш «Эзирлерниң уязы» төлевилел-биле биче хемчээлдиг хүреш залын тудар бис. Сумуда хостуг хүрешке спорт мастерлеринге Солун-оол Мунзукту, Шораан Мунзукту, Павел Сагдыны, Сүгдер Ламажапты, Павел Шаптан дээш өскелерни-даа адап болур.

Бо хүнде сумунуң девискээринде дөрт кудук ажылдап турар. Василий Эренчин болгаш Кызыл партизаннар кудумчуларынга ийи кудукту немей кылыр.

Дүвүлүг хат, дошталган оруктар малчын коданнарже аргыжылганы нарыыдаткан

Мал оолдаашкыны кидин түлүк чоруп турар. Малчын коданнарже аргыжылга нарын байдалда. Бо хүннерде эртенги үеде агаарның соогу 30 градустан куду баткан. Хар чаггаш, дүвүледир хадаан соонда, дошталып каар. Сумунуң чагырга чери ийи-даа катап далбый тыртып, орукту аштап арыглаан бис. Күчүлүг техника чок болганы-биле ук айтырыгны кожуун, ТР-ниң көдээ ажыл-агый яамызының деткимчези-биле шиитпирлеп болур. Малчын коданнарже аргыжылга оруктарын ажыдар оон өске арга чок. Мал чеминиң талазы-биле байдал база дүвүренчиг.

Бай-Дагның девискээринде 69 малчын кыштаг бар. Хууда болгаш арат ажыл-агыйларның саны – 109. «Кыштаг» төлевилелинге алды, «Чаа сорук» төлевилелинге ийи чаңгыс чер-чурттугларывыс киришкен.
Январь 1-ниң көргүзүглери-биле шупту ажыл-агыйларда 11000 ажыг хой, 3800 өшкү, 2900 бода болгаш 3000 чылгы мал бар.