Таңды кожууннуң Бай-Хаак ортумак школазынга болуп эрткен "Өг байырлалы" деп хемчег болуп эрткен.
Школаның оран-савазы ханы уткалыг каастаттынган. Башкылар болгаш өөреникчилер национал тыва идик-хептиг кожууннуң суурларындан, найысылалдан аалчыларны эвилең-ээлдек уткуп-хүлээп алгаш, аяк-шайынче чалап турганнар. Өөредилге чериниң хериминиң иштинде чаартынган өгнү тиккен.
Байырлал өгнүң тывылганының дугайында шиижиткен көргүзүгден эгелээн. "Челээш" элээдилер төвүнүң кижизиттирикчилери, Сосновка школазының башкызы С. М. Оюн база аян тутканнар.
Өг байырлалының кол киржикчилери – кожууннуң школаларындан чыынды бөлүк өөреникчилер. Школаның өрээлдерин өртээлдер кылдыр дерээш, аңгы-аңгы оюн болгаш мөөрейлерни эрттиргени тускай болгаш солун. "Өгнүң дериг-херексели болгаш тургузуу", " Тыва улустуң аас чогаалы", "Тыва хевим –чоргааралым", "Амданныг-ла тыва чемим", "Тос чүзүн малымайны", "Кежик хавы", "Аъттыгда чер көөр" деп өртээлдерде солун даалгалар уругларны манап турган.
Шииткекчилерниң болгаш көрүкчүлерниң үнелелин дараазында киржикчилер дидими-биле чаалап алган. Бирги чер – Кызыл-Арыг школазы,
ийиги чер – Сосновка школазы, үшкү чер – Межегей школазы. Өртээлдер аайы-биле шылгараан школаларны база шаңнаан.
Тываның национал школа хөгжүдер институдунуң, Кызылдың 9 дугаар школазының, Таңды кожууннуң школаларының башкылары «төгерик ширээге» кижизидилгеге хамаарышкан нарын айтырыгларны чугаалажып, чоокку үеде күүсеттинер шиитпирлерни хүлээп алганнар. Дээди категорияның тыва дыл башкызы Зинаида Оюннуң башкарылгазы-биле эрткен.
Школаның директорунуң хүлээлгезин күүседип турар Ольга Санчы киржикчилерге байырын чедирип, чалаттырган аалчыларга четтиргенин илередип, белектерин сунган.
Өг – тыва чоннуң төөгүзү, ооң чарылбас кезээ. Өгбелеривистиң ыдыктыг оран-савазы-дыр.
