Тээли сумузунга Бай-Тайга кожууннуң чагырыкчызының шаңналы дээш республика чергелиг чаш болгаш элээди мөгелер аразынга тыва хүреш маргылдаазы назы-хар аайы-биле беш аңгы чардынган бөлүкке болуп эрткенин чагырга чери дыңнаткан. Спортчу хемчегге республиканын аңгы-аңгы булуңнарындан 185 мөге киришкен.
Бай-Тайга кожууннуң чагырга даргазы Чингис Салчак маргылдааның байырлыг ажыдыышкынынга спортчу хемчег чаш болгаш элээди мөгелерниң сонуургалын улам күштелдирер дээрзин чугаалаан. ТР-ниң спорт сайыдының бирги оралакчызы Саян Монгуш мөгелерге чедиишкиннерни күзээн.
Келир үеде бичии мөгелер аразынга тыва чоннуң национал оюну – хүрешти сайзырадыры-биле маргылдааны эрттирген.
2008-2009-2010 чылдың мөгелериниң аразынга бирги черни Чөөн-Хемчиктен Айдыс Куулар, 2011-2012 чылдың мөгелериниң аразынга бирги черни Сүт-Хөлден Лопсан Монгуш, 2013-2014 чылдың мөгелериниң аразынга бирги черни Улуг-Хемден Сүрен-Маадыр Түлүш, 2015-2016 чылдың мөгелериниң аразынга бирги черни Чөөн-Хемчиктен Бүрбүжүк Куулар, 2017-2018 чылдың мөгелериниң аразынга бирги черни Өвүрден Рамзан Монгуш олар чаалап алганнар.
Кожуун чагырыкчызы «Чараш девиг», «Чараш арга», «Тиилелгеже чүткүл» тускай шаңналдарга төлептиг болган мөгелерни база демдеглеп, акша шаңналдарын тывыскан.
Чыылган чон «Национал тыва хүреш сайзырап, чаш болгаш элээди мөгелер келир үеде алдар-аттыг мөгелер болзун!» деп йөрээл салган.
