Бай-Тайганың хүндүлүг хамаатызы – Анай-Хаак Чамыян

Бай-Тайга кожууннуң удуртулгазының ээлчеглиг аппарат хуралынга кожуун баштыңы Роберт Аракчаа тускай шериг операциязының киржикчизи Анай-Хаак Чамыянга «Бай-Тайга кожууннуң хүндүлүг хамаатызы» деп атты байырлыг байдалга тывысканын чагырга чери дыңнаткан.

Анай-Хаак Петровна Бай-Тайга кожууннуң төп эмнелгезинге эмчи сестралап ажылдап тургаш, 2023 чылдың декабрь айда тускай шериг операциязынче эки турачылап чораан. Шериг керээзиниң хуусаазы доозулган соонда, ол эрткен чылын декабрьда өскен-төрээн Бай-Тайгазынче ээп чанып келген.

Дурт-сыны бичежек-даа болза, эмчи сестразы эрес-дидими-биле дайын шөлүнге балыгланган шеригжилерге бирги эмчи дузазын чедирип, чеже оолдарның амы-тынын камгалаваан дээр!

Бай-тайгажылар эрес-дидим эмчи сестразы чаңгыс чер чурттуунга чоргаарланып турарлар. Олар тускай шериг операциязында киржип турарларга тиилелгелиг аал-оранынче чанып келирин күзээн.