Бай-Тайга кожууннуң чагырга даргазы Чингис Салчак уруглар садтарының ниити байдалын хынап көөрү-биле сумуларже ажыл-агыйжы үнүүшкүннерни чорудуп турарын чагырга чери дыңнаткан.
Бо удаада Бай-Тал сумузунуң «Салгал» база Кызыл-Даг сумузунуң «Хүнчүгеш» уруглар садтарынга кожууннуң өөредилге эргелелиниң даргазы Аңнаар-оол Хирлиг-оол-биле четкен.
«Салгал» уруглар садында амгы үеде 105 уруг хаара туттунган.
«Шагдагы интернат турган черде бо уруглар садын ажыткан. Чонувустуң чаш ажы-төлү эптиг хандырылгага турзун дээш шыдаар шаавыс-биле ажылдап турар бис. Амгы үениң негелдези-биле бо оран-саваның турар чер шуут дүүшпес. Ханалары болгаш шалалары ирип калган. Дериг-херекселивис база эргилээн» – деп, уруглар садының эргелекчизи Хөвеңмаа Хертек чугаалаан.
Кызыл-Дагның «Хүнчүгеш» уруглар сады база-ла эргилээн, хүнү-биле үндезин септелге негеттинип турарын, бо талазы-биле айтырыгны каш удаа көдүрүп келгенин ооң эргелекчизи Олимпиада Кужугет дыңнадып, дуза дилээн.
Кайы-даа уруглар садтарының башкылары болгаш ажылдакчылары боттарының демниг чоруу-биле чылдың-на септелгени чорудуп, тура дүшпейн тура-соруктуг ажылдап турар. Өөредилге албан черлери чылыг, чырык болгаш арыг-силиг.
Чагырга даргазы болдунар шаа-биле дуза кадарын аазаан.
