«Кадык камгалалы» национал төлевилел-биле Бай-Тайга кожууннуң Бай-Тал суурда эмчи амбулаториязы туттунган. ТР-ниң кадык камгалал сайыдының оралакчызы Орлан Ондар бай-талчыларга чаа эмнелге албан черин ажыглалче кииргени-биле байыр чедирген.
1960 чылдарда Бай-Тал суурнуң эмнелгези ийи аал чурттаар бажыңга турган. Көдээ эмнелгениң баштайгы эмчилери – Алдын-Кыс Сонам, Моня Делег-оол. 1976 чылда эмнелгени эмчи амбулаториязы кылдыр эде тургускан.
Эмчи амбулаториязы чогуур медицина дериг-херекселдери-биле четчелеттинген, изиг-соок суглуг, арыгланып-аштаныр өрээлдиг болгаш сөөлгү санитарлыг негелделерге дүгжүп турар. Үжен чыл стажтыг терапевт эмчи Любовь Делег-оол, уруглар эмчизи Чаяна Амыдак аңаа ажылдаар. Ол ышкаш уругларның кадыкшылын школа болгаш уруглар садында фельдшер болгаш эмчи сестралары хайгаарап турар.
Эмчилерниң хайгааралында суурнуң 1137 чурттакчызы база 594 чаш бар. Ам тус черниң чурттакчылары таарымчалыг байдалда бирги эмчи дузазын алыр аргалыг апарган.
«Кадык камгалалы» национал төлевилелдиң күүселдези-биле республиканың суурларында амгы үениң негелделери езугаар дериттинген фельдшер-акушер пунктулары база эмчи амбулаториялары ажыттынып турарын сагындыраалы.
#Кадыккамгалалы #Националтөлевилел #Бай_тайгакожуун #Бай_тал #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
