Балгазын суурда Тываның агроүлетпүр техникумунуң ниити чуртталга бажыңының септелгези доостур чадазында

Таңды кожууннуң Балгазын суурда Тываның агроүлетпүр техникумунуң ийи дугаар ниити чуртталга бажыңының үндезин септелгези дооступ турарын ТР-ниң Өөредилге яамызы дыңнаткан.

«Профессионалитет» федералдыг программа-биле 2023 чылдан эгелеп өөредилге чери көдээ ажыл-агый кластериниң бааза участогу апарган. «Аныяктар болгаш уруглар» национал төлевилел күүселдези-биле техникумну септеп турар.

Россияның чырыдыышкын сайыды Сергей Кравцов эрткен неделяда улуг септелге ажылдарын хынаан. Өөредилге албан чери национал төлевилелдиң «Профессионалитет» программазынга киржип, өөредилге корпузун болгаш бир дугаар ниити чуртталга бажыңын чаарткан. Тываның техникуму бо чылын федералдыг программаже кирген 300 колледжтиң бирээзи деп, сайыт демдеглээн.

Бөгүнде «Стройсервис» кызыгаарлаан харыысалгалыг ниитилелдиң тудуг организациязы элээн хөй ажылдарны кылган. Тудугнуң таваан быжыглаан, дээвиирин бүрүнү-биле солуп, быжыг болгаш өртке удур материалдан тудуп үндүрген. Чылыг системазын бүрүнү-биле чаарткан, чаа хоорзаларны болгаш шой батареяларны салган.

Соңгаларны амгы үениң көзенектери-биле солуп, чаа эжиктерни эптеп, ол ышкаш өртке удур демир эжиктерни салган. Тудугнуң серизин бүрүнү-биле солуп, суг дамчыдар системаны чаарткан. Оран-саваның даштын чылыглап, үрдүрүп агаарладыр дериг-херекселдерни кылган.
Тудуг тавааның сугдан камгалалын быжыглаан, туттунар черлиг, шаптараазын чок тепкени салып, септээн. Иштики ажылдар бүрүнү-биле доозулган. Тудугжулар амгы үеде сөөлгү ажылдарже кирген: шаланың кырындан чадып, шимелде ажылдарын чорудуп турар.

Ооң-биле чергелештир видеохайгаарал болгаш өртке удур медээ системаларын эптеп дооскан. Бо ажылдар студентилерге эптиг болгаш айыыл чок чурттаар байдалдарны тургузарының чугула кезээ болур.

Чаарттынган ниити чуртталга бажыңы чаа өөредилге чылында чурттакчыларын уткуп алыр. Амгы үеде техникумда 560 сургуул өөренип турар.