TMG news

Балгазында школаның тудуун чыл төнчүзүнге чедир доозар ужурлуг

23 марта 2023
108

Тываның Чазак Даргазының оралакчызы Александр Брокерттиң удуртулгазы-биле Таңды кожууннуң Балгазын суурда чаа школаның тудуун хынап көргенин ТР-ниң Өөредилге яамызы дыңнаткан.

Үнүүшкүннүг хуралга Өөредилге яамызының төлээлери – Херел Наксыл, Евгений Овсянников база тудуг сайыдының хүлээлгезин күүседип турар Аяс Хунай-оол болгаш Таңды кожуун биле Балгазын суурнуң удуртулгазы киришкен.

Ажылчын бөлүк саң-хөө хандырылгазының айтырыгларын, тудуг объектизиниң ажыглалче киирер хуусаазын, кадрлар хереглелиниң болгаш тудуг ажылдарының үезинде тургустунуп келген өске-даа айтырыгларны сайгарып чугаалашкан.
Чылыг үениң дүшкени-биле, хүлээникчи организация объектиниң тудуун керээде айыттынган хуусаада доозары-биле, тудуг ажылдарын шапкынчыткан.

2022 чылдың ортан үезинде 616 олуттуг школаның тудуун «Өлчей» кызыгаарлаан харыысалгалыг ниитилел эгелээнин сагындыраал. Школаны чылдың төнчүзүнде доозар ужурлуг. Бо хүнде спорт болгаш хуралдаар залдарның ханаларын тудуп үндүрүп эгелээн. Ооң-биле чергелештир инженер четкилерин база чорудуп турар.

Редакция TMG