Тускай шериг операциязының киржикчилеринге болгаш оларның өг-бүлелеринге социал деткимче хемчеглерин калбартыр ажылдар республикада уламчылап турар. Бо шиитпирни Тываның Баштыңы Владислав Ховалыгның Айтыышкынын күүседип, хереглелдиг кижи бүрүзүнге үе-шаанда, билдингир, чедингир дузаны көргүзер дээн шиитпир хүлээп алдынган.
Балыгланган, контузия алган азы берттинип кемдээшкин алганындан инвалид апарган тускай шериг операциязының киржикчилеринге чаңгыс катап бээр материалдыг дузаламчы – чаа кирген кол чүүлдерниң бирээзи болган.
Төлевирниң хемчээли инвалид бөлүүнден хамааржыр:
I бөлүк – 100000 руб;
II бөлүк – 50000 рубль;
III бөлүк – 30000 рубль.
Төлевирни алыр дизе, доктааткан майыкка билдириишкинни база чогуур документилерни киирер. Ол дээрге республикада чурттап турарын бадыткаан шынзыдылга документ, хууда медээлерин хынап көөрүнге чөпшээрел, тускай шериг операциязының даалгазын күүседип тургаш балыгланган дугайында бижик, инвалид болганын шынзыткан эмчи-социал экспертиза бижииниң хоолгазы, тускай шериг операциязынга киришкенин бадыткаан документ, акша-хөреңги шилчидериниң банк агар санының реквизиттери-дир.
Билдириишкинни ТР-ниң Күш-ажыл болгаш социал политика яамызы азы чурттап турар чериңерде Хөй ажыл-чорудулгалыг төп таварыштыр киирип болур. Шупту билдириишкиннерни доктааткан хуусаада болгаш айыттынган негелделерге дүүштүр сайгарып көөр.
«Республикада доктаамал бүрүткелдиг болгаш ооң мурнунда өске регионга ындыг деткимчени албаан Тывадан шериг албан-хүлээлгелиг кижилерге бо деткимче хемчээ көрдүнген» – деп, ТР-ниң Күш-ажыл болгаш социал политика яамызы дыңнаткан.
Тываның Баштыңы Владислав Ховалыг бодунуң Айыткалында деткимче бээр система эптиг болгаш ажык-чарлыг болур ужурлуг дээрзин демдеглээн.
«Аңгы-аңгы органнарның ачы-дузалары тускай шериг операциязының киржикчи бүрүзүнге болгаш оларның өг-бүле кежигүннеринге билдингир болур ужурлуг, база ону «чаңгыс көзенек» хевирге көргүзери эң таарымчалыг. Күш-ажыл яамызы Хөй ажыл-чорудулгалыг төп-биле кады чаңгыс билдириишкинни хүлээп албышаан эрге-чагырганың шупту харыысалгалыг органнарынче ол-ла дораан чорударын хандырар ужурлуг» – деп, Владислав Ховалыг демдеглээн.
Республикада тускай шериг операцияларының киржикчилеринге болгаш оларның өг-бүлелеринге мооң мурнунда көргүзүп турган күрүнеден деткимче хемчеглери бо чылын долузу-биле уламчылаар деп, Тываның Баштыңы бодунуң Айыткалында айыткан.